Fuersichtigen ersamen und weisen besunderlieb herren und guet freunde Unnser willig freuntlich dinst sind ewer Ersamkait alltzeit mit fleiße zuvoran berait, lieben freundt alz uns ewer weishait yetz geschr(iben) hat, von Berchtolden Hessen wegen etc. Habenn wir wol vernommen und las-senn ewer Ersam wissenn daz der benant Hess unnser Burger nicht enist, dann ewer fuersichtikait zulieb, haben wir den Hessenn fuer uns gevodert, ewern brief hoeren lassenn, In geweist und mit Im Soverer geredt daz er, alz er uns zusagt, gern zu ainem freuntlichen tag und verhoern fuer ewer weishait komen und sein sach daselb ertzelen wil wenn Im des ewer freuntschafft ain ge-schriben unvaerlich sicher glaitt gebenn hat Alz er solichs ewer Ersamkait selber aygenlich zu-schreibt. Wir vermainen auch So ewer weishait In und sein widertail gegen einander hoeren, daz ir sy villeich baiderseit weisen und dy sachen zwischen in guetlichen ainen werdet. Dann wo wir ewer Ersamen weishait und den ewern In den oder anndern sachen zu dinst und gevallen werden moechten waeren wir alltzeit willig. Datum feria quarta post Circumcisionis domini Anno eiusdem XLIII°. Rat der Stat zu Regenspurg

Source Fulltext: Peter Peusquens