Fridreich von gotes gnaden Romischer Kunig zuallenzeiten Merer des Reichs, Hertzog ze Osterreich und zu Steir etc. Erbern weisen und lieben getrewn. Als weilent der Vinsterwalder ewr mitburger, yetz mit tod abgangen ist, also hat uns unser getrewr Urban Tieboltskircher unnser dyenner furbracht, wie er desselben vinsterwalder nechster freund sey, und Im mit Sippschafft zugehort hab. Darumb so Begern wir an ew mit sunderm fleizz, daz Ir demselben Tiepoltskircher hilfleich Rattsam und beybestendig seyt, damit Im solh hab und gut so derselb vinsterwalder hinder Im gelassen hat, als seim nachsten freunde und Erben volge, und geantwurt werde. Daran tut Ir uns ain gut gevallen. Geben zu der Newnstat an Eritag nach Sannd Mathias tag apostoli. Anno etc. quadragesimo tercio, unsers Reichs im dritten Jare. commissio domini Regis, Leop(oldo) Tuemayr, camerario, referente.

Source Fulltext: Peter Peusquens