Gestrengen, woltuechtigen, Ersamen, und weisen, Sunder-lieben herren, frewnd, und guenner, unsern willigen dinst bevor. Wir tuen euch zu wissen, daz uns aber als hewt, ein gewisse war-hafftige potschafft chomen ist, und tegleich ein warnung ueber die ander haben, wie das sich der kunig von Polan, yetzund zu weissenburg mit den Ungern sampt, zu heer, und der Czappko, und die drey Nyderspewger, ytzund vor Raab, mit Irem trefleichen zeug, auch puchsen, laytern, Scherm etc. gewesen sein, dadurch sy dann haymleich bey der nacht, das gesloss erstigen und gewunnen haben wolten, Aber got der Almechtig, der aller gerechten ein beschirmer ist, das durch uns mit seinen gnaden understanden hat, Also daz wir In, die laittern, Scherm und andern tzeug, mit Newn Schlitten, genomen, und abgeslagen haben, also daz sy In der flucht, etleich von der pruck gevallen, und in dem Eyse ertruncken sind, und die puchsen in der Raba versenckt habent. Nue ziehent sy eylent, gen weissenburg zu der sampnung der Ungern, und haben muot, alspald mit demselben heer wider zechomen, und sich legern fur das gesloss Raab, und sprechent, gewynnen sy dasselb sloss, so haben sy dann, die Strass und den Slüssel, zu den landen, hoffen wir, ewr aller weishait werd ain solleichs wol bedencken, was schadens davon choemen moecht, ob wir mit gewalt betwungen wuerden, das wir unserm Erbhern, das gesloss also verluern, da got vor sey, Als dann zu besargen waer, daz wir einer solleichen macht, an huelff, in die leng nicht wol furgesein moechten. Darumb lieben herren, so pitten wir ewr aller weishait und frewntschaft mit fleisch (sic!), und rueffen die an, daz Ir durch des benanten ewrs, und unsers, naturleichen Erbhern, kuenig laslas, und seiner gerechtichait willen, in den obgeschriben sachen, uns huelf-leich, Ratsam sein, und dartzu also thuen wellet, damit wir den veinden understeen und seinen gnaden das gesloss behalden muegen, daz dadurch andern seinen landen, leuten und steten un-ueberwintleich schad davon nicht entstee. Als ewr aller weishait das selbst pas versten mag, das wir all, umb dieselb ewr weishait nach allem unserm vermuegen, zu allen zeiten wo sich das ge-puert, trewleichen verdienen wellen. Geben zu Rab am Samstag vor fasschang. Anno etc. XLIII°. Jost von Cwssa, und Farckas lasla haubtlewt zu Rab etc.

Source Fulltext: Peter Peusquens; siehe auch: Schlager, Wiener Skizzen, N. F. 3, 507-508