Nos Lodovicus dei gratia Rex Hungarie. Memorie commendantes. Tenore presentium Significamus quibus expedit universis. Quod nos sana deliberatione prehabita, omnes Carnifices de Civitate Wyenensis, ac omnes homines colentes et laborantes plateas et districtus, de ducatibus seu provinciis illustris principis domini Alberti ducis Austrie Styrie et Karinthie fratris nostri karissimi, usque in Suprunium, perpetuo securavimus in hunc modum, quod in villa Chyeagi, de singulis curribus ponderatis, ad ecclesiam beate virginis donec eadem suo restauratur et perficitur opere, daturi sint unum obulum tantum, Similiter in Tributo fratrum Cruciferorum de Suprunio, de uno quoque Lodice, sive pecia panni grisei, tres obulos et nichil ultra. de aliis autem Mercimoniis quibuscumque daturi sunt tributum sicut a dominio et Civibus eiusdem Civitatis extitit ordinatum. In super prescriptis hominibus promisimus et promittimus in hiis scriptis, quod si unus vel plures ex ipsis ab uno vel pluribus Regnitarum seu Castellanorum nostrorum Iniuriose investigaretur seu angariaretur, et si quid dampni exinde oreretur, quod pro tunc illis dampnum perceptum penitus reformemus. Ceterum promisimus sepefatis hominibus quod si in prescripto Regno nostro exparte profugorum seu spoliatorum aliquid dampni perciperent, quod extunc eisdem nostrum subsidium expostulantibus in adiutorium fideliter veniamus. Quocirca omnibus Comitibus Castellanis et Ministerialibus nostris pronunc constitutis aut inposterum constituendis Regio edicto precipiendo mandamus quatenus prefatum commissum una nobiscum ratum et gratum perpetue sint penitus habituri. Datum Bude feria secunda proxima post festum Nativitatis beate virginis, anno domini M°. CCCmo. Lmo. secundo.

Source Fulltext: Peter Peusquens u. Hormayr, Wien 2, UB. 74 no 72.