Ich. Niclas der Galle. . Vergich und tuen Chuent allen den die disen brief lesent. oder horent lesen. daz die erbern lewt . her Michel der Schuechler zu den zeiten Richter ze wienn. her Lucas Popphinger zu den zeiten hansgraf ze wienn . und her Jans der Schuechler . allez daz vollikchleichen . verricht volendet . und vol pracht habent daz nach dem spruch erber lewt. ze pezzrung aufgesatzt ist. fur die intzicht meins vettern tode Andres. dez Gallen. weilent her Chunrats diener dez Uerbetschen. dem Got gnade. do fur die egenanten drey erber man puergel gewesen sint. und dar umb so sol ich . noch alle die . die meinem vettern Andren dem Gallen. mit frewntschafft gesippt sint . oder zu gehorent . Swie so die genant sint . fuerbaz hintz allen den. die in der intzicht meins vettern tode . Andres dez Gallen gewesen sint . oder schulde dar an gehabt habent. fuerbaz mit dehainer lay sachen . dehainen haz . neyde noch veintschafft Nymmermer gehaben noch getragen . weder mit worten . noch mit werichen. an alles Gever . und schuellen si daz haben auf mier und auf allem meinem Guet . daz ich han in dem Lande ze Oesterreich. oder auzzer Landez . Swo ich ez han . Ez sey erbguet oder varunt guet . Swie So daz genant ist . Ich sei lembtig oder tode. und Gibe in dar uber disen brief ze einem warn Sichtigem urchunde diser sach versigilt mit meinem Insigil. und mit dez erbern manns Insigil Niclas dez Chletter der diser sach getzeug ist mit seinem Insigil. Der brief ist geben ze Wienn nach Christs gebuerde dreutzehen hundert iar dar nach in dem funf und funftzigistem iar dez nachsten Phintztags . Nach sande Erharts Tag.

Source Fulltext: Peter Peusquens