Ich Jans der Voegell purger ze Wienne Vergich und Tun chunt allen den die disen brief lesent oder horent lesen . die nu lebent und hernach chuenftich sind . daz ich mit guetem willen mit verdachtem muet . und mit willen und guenst meiner Hausvrowen vron Elzbeten . zue der zeit do ich ez zerecht wol getuen mochte . Recht und redleich geschafft han umb ein ewigew Messe in sant Marxs und der Chawflaeut zeche ze Wienne . zwelifthalb (11 ½) phunt wienner phenning geltes puerchrechts . die da ligent, achthalb (7 ½) phunt geltes auf der Voglinne haws gelegen an dem Newnmarchte ze Wienne . ze nachst Andres Haws weiln des Hertzogen chamrer. und vier phunt gelts auf dem Tuern gelegen in dem Gaezzlein an den Hunerrpuehel an dem Hohenmarcht ze Wienne . ze naechst Jansen haus dez Roten . also mit aufgenomener rede . wer der vorgenanten zeche zechmaister ist . der sol mit den egenanten zwelifthalben (11 ½) phunden geltes ewichleich alle tag taegleich ein Messe fruemen datz einem erbern priester der chain ander Gotsgab habe . der die selben Messe sprechen sol mein und meiner hausvrowen seln ze hilff und ze trost . an allez verziehen und an alle sawmung . und das ditzs Geschaefft fuerbas also staet und unzerbrochen beleibe . dar uber so gib ich disen brief zue einem waren urchuende diser sache versigilten mit meinem Insigil . und mit der zwair erbern manne Insigiln . Chuenrats des Muenzzer und Chuenrats von Regenspuerch purger ze Wienne . die ich Jans der Vogell . und ich Elzbet sein hausvrow mit gesampter hant dez vleizzichleich gepeten haben . daz si diser sache gezeug sint mit iren Insigiln . Der brief ist geben ze Wienne . nach Christes gebuerd . dreutzehen hundert iar dar nach in dem sechtzigisten iar . dez Phintztages in der andern vastwochen.

Source Fulltext: Peter Peusquens