Ich Ott der Tanprukker zue den zeiten amptman dez chlosters ze Newnburch . Vergich offenleich an dizem brief . daz fuer mich chom do ich sazz an offem Gerichte auf dez egenanten chlosters guet . der erber priester . her Nichlas von Raechleinstorff zue den zeiten chapplan der ewigen Messe die sein prueder Fridreich weiln hern Reimprechts schreiber dez Zawnrueden . den Got genade . gestifft hat in der chappellen unser vrowen in der puerger Rathaws ze Wienne hern Ottenhaimen saeligen stiftung . und chlagt mit vorsprechen an der selben seiner Messe stat . auf Stephans weingarten dez Fleischundchrawts gelegen ze Otachrinne auf der Chalichgrueb dez ein halbs jewch ist zenaechst des Holtzer weingarten umb sechs phunt wienner phenning versezzens puerchrechtes und umb alle die zwispild die mit recht dar auf ertailt und gegangen sint als verre. untz daz im ertailt wart . ich solt im mit recht poten dar auf geben . die den egenanten wein-garten mit sampt den Perchgnozzen schawten und schatzten ob er icht tewrer waer denne daz versezzen purchrecht und die zwispilt die mit recht dar auf ertailt und gegangen sint . dez gab ich im Otten den schawr und Micheln die zwen vorsprechen . die habent auch mit sampt den perchgnozzen den egenanten weingarten geschawt und geschatzt . und chomen do wider fuer mich do ich sazz an offem Gerichte . und sagten daz bei iren trewen als si ze recht solten . daz der vorgenant weingart als tewr icht waer als daz versezzen purchrecht und die zwispilt die mit recht dar auf ertailt und gegangen sint . Und pat auch do der egenant her Nichlas vragen waz nu recht waer . Do geviel im mit vrag und mit urtail und wart auch vervolgt und ertailt . er solt mir mein recht geben daz hat er getan . und solt ich in dez egenanten weingarten gaentzleich gewaltich machen und an die gewer setzen daz han ich auch getan . also daz der selb her Nichlas und sein nachchoemen die der egenanten ewigen Messe nach im chapplan und verweser sint . den oftgenanten weingarten sullen fuerbas ledichleich und vreileichen haben und allen iren frumen da mit schaffen verchawffen versetzen und geben wem si wellen an allen irresal der egenanten Messe ze nutz und ze frumen . Und dez ze einem urchuende und ze einem gezeug Gib ich in disen brief versigilten mit meinem Insigil . Der brief ist geben nach Christes gebuerd drewtzehen hundert iar dar nach in dem sechtzigisten iar . dez naechsten phintztags nach dem heiligen Ostertag.

Source Fulltext: Peter Peusquens