Ich Prueder Pylgreim von La, ze den zeiten Prior, und aller convent gemain Prediger Ordens ze Wyenn, vergehen offenleich an disem prief daz uns der Erber man Joerig der Ryemer geben hat Newn phunt wyenner phenning Mit fuenf phunden hat er von uns ab geloest sechs schilling wyenner phenning Geltes die uns der erber man Ott der mayr, selig, geschaft hat auf seinem haws gelegen ze wyenn gegen sand Jacobs tor ze naest Jansen dem Ryemer, umb ainen Ewigen jartag, und denn mit den andern vier phunden hat er auch von uns ab geloest ein halb phunt wyenner phenning geltes daz uns der erber man Chuntz der Ryemer der mayr auch geschaft hat Also beschaidenleich daz wir und all unser nachchoemen begen schullen ainen Ewigen jartag mit selmesse mit vigili und mit anderm unserm gepet, nach unsers Oerdens gewanhait alle jar Ewichleich an sand Sixti tag, des vorgenanten Otten sel des mayer und auch Chuentzen sel des mayer payden mit einander. Und daz wir den jartag ewichleich begen alle jar als vorgeschriben stet dar zue verpinden wir uns und all unser nachchoemen mit unsern trewn und gewen im all diser sach uerchuende disen prief versigilten mit unsern payden anhangunden Insigiln nach Christes gepuerd drewtzehen hundertjar dar nach in dem sechtzgisten jar an sand Thyburcii Tag.

Source Fulltext: Peter Peusquens