Ich Wolfgang Hewtl und Ich Georg Lanng bed dertzeit des Rats der stat zu Wienn. Beckennen mit disem brief, daz fur den ytzbenannten Rate komen ist, der Ersam geistlich briester her Michel Helnstainer und begerte alda ime ettlich herrn zuezegeben zue schaetzern aines haus hie innerhalb Werderthor mit ainem tail zenagst Georgen Zwetler des schuester haus gelegen. Also sein wir bed zu solher schatzung verordent und gegeben worden, und haben demnach mitsambt den vier gesworen werchlewten daselbs, daz berurt haus aigentlich besicht beschaut. und umb ain hundert und zwaintzig phunt phenning gueter Lanndswerung in Osterreich geschaetzt, der es wie das ytz ligt und nit mer noch tewer wordt ist, an geverde. Darnach komen wir hinwider fur den obgenannten Rate und sagten da unnser kuntschafft solher schatzung halben als wir zu Recht sollten, und geben darauf aus haissen und bevelh desselben, dem obbestimten herren Michelen Helnstainer disen schatzungsbrief verferttigten unnder unnsern zurugkh aufgedruchten petschadten, doch unns und unnsern Erben an schaden. Geschehen an Mittichen nach dem Sontag Judica in der vasten, anno .. (XVC).. im sechsundzwaintzigisten.

Source Fulltext: Peter Peusquens