Wir Hanns Sueß zu den zeiten Burgermaister und der Rate gemain der Stat zu Wienn, Bekennen, daz wir die ewigen drey Messen, die weylend des geistlichen Briester herr Simon Reschen von Gryntzing seligen Geschaefftlewt in sand Michels pharrkirchen auf unnser lieben Frawen alltar allhie zu Wienn, wochenlich zelesen gestifft haben, der wir recht ungezweiflt Lehenherren seyn, und unns mit tod und abganng Paulen Groskopf briester, als nagstem Capplan ledig worden ist. Dem Ersamen geistlichen herren Bernharten Gumpl briester, umb gotswillen genedigklich verlichen haben, und leichen Im auch die hiemit in craft dits brief. Also, daz Er die gult und gueter zu bemelter Stifft gehoerig, pewlich, wesenlich und unwuegstlich, innhaben nutzen und niessen, und davon die benannten Messen, durch des gedachten Stiffter, und aller gelaubigen Seelen hails willen, in gemelter sand Michels kirchen, und auf bestimbtem altar, ausrichten und lesen soll, on all versawmbnus. Dartzue dieselben messen, on unnser als Lehenherren wissen und willen, nyemannts Resigniren verwechseln noch ubergeben, auch sich sonst wider unns unnser Nachkoemen, gemeine Stat Wienn und derselben Freyhait weder mit Rat noch tat nit widerwerttig halten soll, in kain weis getrewlich und ungeverlich. Mit urkund des briefs, besiglten mit unnserem anhangunnden Statinnsigill. Geben zu Wienn an phintztag nach dem heiligen Ostertag, Nach Christi geburde, funftzehenhundert und im Sechsundzwaintzigisten Jare.

Source Fulltext: Peter Peusquens