Wir Ferdinannd von gotes gnaden, Printz in Hispanien, Ertzhertzog zu Österreich, Hertzog zu Burgundi, Steir, Kernndtn, und Crain, zc. Bekhennen, das unns der Erber unnser lieber andechtiger, Jheronimus Guettenperger, anbracht, wie in negstverganngner prunst, des funfundzwaintzigisten jars, das haus alhie, in unnser Stat Wienn in der Weyhenpurgkh gegen sanndt Jheronimus Closter ueber gelegen, so weilennd Absolon Ynntzinger, zu ainer Stifft zu den Himelportten, yetz seiner innhabung, und verwallttung erkhaufft, und ain Burgkhrecht, nemblich zwayhundert phunt phening, davon mon jerlich acht phunt phening raichett, von gemelter, unnser Stat darauf lege, innhallt des Burgkhrechtbrief, des glaubwierdig abschrifft. Er unns deshalben fuerbracht, verbrunnen, auch sonnst mit anndern seinen guettern, durch den Schaur, herttigclich, und dermassen verdorben, das ime nicht mueglich were, dasselb haus widerumb aufzebawen. Und aber die Ersamen weisen, unnser besonnder lieb, und getrewen .n. Burgermaister Richter und Ratt unnser Stat daselbst zu Wienn, unnserm vicestathallter, und Hofratt, unnser Nideroesterreichischen lannde solhes Burgkhrecht halben, ir schrifttlich unnderricht gethan, dieweil sy des Burgkhrechtbriefs ain glaubwierdige abschrifft gesehen, weren sy erbuttig, dasselb Burgkhrecht der acht phunt phening abzulosen. Und damit aber solh haws widerumb zu erhalltung. des Stiffts. und aines Caplans, aufgebautt, und stifftlich erhallten werden mochte, darzu Er dann annder sein vermugen darstregkhen, und solh gebew zu furderlicher zeit volfueren wollte Batte Er unns diemuetigclichen, das wir als regierunder herr und lanndsfurst zu solher ablosung, unnser gonnst und willen zu geben, genedigclichen geruechten. Haben wir angesehen. des gemellten Guettenpergers, diemuettig, und vleissig bete, und sonnderlich, das Er in diser brunst, so swerlich verderben, und das haws, fur sich selbst zu pawen, nicht vermuglich ist, und dardurch, und aus sonndern gnaden, auch das die stifft, und der Gotsdiennst in wesen erhallten, das haws erbautt, und die weingartten nicht veroedt werden. Zu der obgedachten abloesung, unnsern gonnst, und willen geben. Derwilligen auch darein, hiemit wissenntlich. in crafft. des briefs, also das vorberurtter Guettenperger, als diser zeit besitzer, und innhaber, des Beneficy, von solher ablosung der zwayhundert phunt phening, das bemellt haws, mit obbestimbter unnser Burgermaister und Ratt. vorwissen. die an unnser Stat ir aufsehen darauf haben sollen. widerumben seiner notturfft. nach erbawen, und in annder weeg. zu aufnembung des Beneficium. und unnderhalltung der weingartten. gebrauchen und anlegen muge. ungeverlich. Mit urkhund des briefs. Geben in unnser Stat Wienn am vierzehenndn tag. des Monats Juny. Nach Cristy geburde. im funfzehenhundert und sechsundzwaintzigistn Jarn.

Source Fulltext: Peter Peusquens