In nomine domini; amen. Nos frater Symon,¹ dei et apostolice sedis gracia episcopus Castoriensis, notum facimus fidelibus tam presentibus quam futuris universis, quod anno dominice incarnacionis MCCCLXXX pridie ydus februarii in basilica ecclesie domus beate Marie in Achspach, Cartusiensis ordinis, Pataviensis dyocesis, duo altaria de beneplacito et consensu domini nostri graciosi, domini Johannis, episcopi Pataviensis, cuius officium in hac gerimus parte, dedicavimus unum in dextera parte in honore corporis et sangwinis Christi et omnium sanctorum, in quo perpetuam dei ob veneracionem et piam sanctorum memoriam recondite sunt reliquie subnotate videlicet: de tunica domini, de sepulchro domini, de lapide, in quo dominus hora passionis oravit et sudorem sangwineum sudavit, de lapide, in quo dominus sedit, quando cum discipulis suis cenavit, item beatorum Petri et Pauli apostoloruin, item Mauricii et sociorum eius, Ignacii. Sigismundi, Oswaldi, Eustachii martyrum; item Augustini, Udalrici episcoporum, item Marie Magdalene, Agnetis. Ursule, Kristine, undecim milium virginum; alterum altare in sinistra parte in honorum beati Michahelis et omnium angelorum, in qua requisite reliquie subscripte videlicet beatorum Andree et Jacobi apostolorum, item Laurencii, Ursi, Viti sanctorum Thebeorum martyrum, item Innocencii pape, Augostini episcopi, item Katherine, Margarete, Dorothee, Elizabet, undecim milium virginum, quorum scilicet dedicacionis festum annis revolucionibus perpetuo agendum transferimus ad diem dedicacionis ipsius ecclesie, in quo dicta altaria sunt locata, scilicet quia inmensa dei clemencia circum fideles precipue pro favore prosequitur, cum ipsorum devocio sanctorum partibus adiuvatur ac Christi fideles eo frequentius ad devocionem confluunt, quo ibidem dono celestis gracie refici se conspiciunt. Cum igitur venerabiles et religiosi in Christo nobis dilecti, dominus Johannes prior totusque conventus prefate domus devote ac humiliter supplicaverit, quatenus pro devocione ipsius domus augmenda^a spiritualia munera largiri dignaremur, nos itaque dictis supplicacionibus favorabiliter annuentes de omnipotentis dei misericordia et beatorum Petri et Pauli apostolorum auctoritate confisi omnibus vere penitentibus, qui dictum monasterium et altaria prenotata in festis videlicet circumcisionis resurreccionis ascensionis domini pentecostes trinitatis corporis et sangwinis Christi, in omnibus solempnitatibus beate Marie virginis, in festis singulorum apostolorum, in festo Michahelis, in festo omnium sanctorum necnon in festis patronorum. quorum reliquie ibi sunt recondite, et in festo dedicacionis ecclesie devote visitaverit, insuper qui predicacionibus verbi dei in capitulo monachorum vel eciam conversorum ac misse beate Marie virginis, que cottidie apud eos legitur, devote interfuerint, quadraginta dies de iniunctis penitenciis prelibata auctoritate misericorditer in domino relaxamus, dummodo predicti dyocesani ad hoc concurrat consensus. In quorum omnium evidens testimonium sigillum nostrum presentibus est appensum. Datum loco anno die quo supra. Nos Georgius, dei et apostolice sedis gracia episcopus Pataviensis, suprascriptas indulgencias, si et in quantum provide facte sunt, ex certa sciencia confirmamus ratificamus et approbamus XL dies indulgenciarum adiungentes horum testimonio litterarum sigilli nostri appensione munitarum.

Source Fulltext: FUCHS, Aggsbach (=FRA II/59, 1906) S. 45-47