Wir Johanns von gotes genaden bischof ze Pazzaw bekennen und tu^en kunt, wannd wir den edln ersamen Hannsen und Go^erigen gebrudern von Meyssaw und allen iren erbern eriben, die hernach geschrieben zehent gelegen auf dem Axwald dacz den Mairhofen,¹ dacz den Lehen,² dacz den Hofsteten³ und dacz Fronbarn² halben zehent klainen und grossen und ze Charnarn⁴ von ainem hof und von vier lehen und von zwain huben und von ainer hofstat, die hat fu^enf jeuch in alle veld, und von ainen und zwainczig jeuch u^eberlend ganczen zehent klainen und grazzen und ze Lerichveld⁵ von drin ganczen lehen von dem ainen ganczen halben zehent und von den zwain auch halben zehen^a am^b ain viertal und von vier akchern in dem Sicher⁶ auch halben zehent an ain viertail klainen und grozzen und ze Scheibelwisen⁷ ganczen zehent klainen und grossen, die enher von uns und unserm goczhaus ze Pazzaw lehen sind gewesen und di si auch von uns ze lehen gehabt habent, durich irr vleizzigen pet willen gunstleich geaigent haben und aigen auch mit kraft dez briefs. Darumbe habent si zu Widerlegung derselbn obgenanten zehent, die wir in geaigent haben, von uns und unserm goczhaws ze Pazzaw irs rechten freys aygens zwelif pfunt gelts gelegen ze Molmestorf⁸ in Hadmanstorffer⁹ pfarr auf behawstem gu^et und auf u^eberlend ausgenomen der holczer, die zu demselben dorf Molmestorf⁸ geho^erent, zu rechtem lehen genomen und enpfangen und si selben und auch all ir eriben sullen dieselben zwelif pfunt gelts von uns und von unserm goczhaws und von allen unsern nachkomen furbas zu rechtem lehen erkennen und von uns, swenne und als offt daz ze schulden ku^emt, zu lehen nemen und enpfahen, als lehens recht ist, an alles geva^erd mit urku^end dez briefs besigelten mit unserm angehanngen insigel. Geben ze Wienn an sand Kathreintag nach Kristi gebu^erde drewczehenhundert jar und in dem vierundachczigisten jare etc.

Source Fulltext: FUCHS, Aggsbach (=FRA II/59, 1906) S. 69-70