Ich maister Ulr(eich) der maler, purger zu Pazzaw^e, mein hausvrow^e und all unser erbn vergehn und tu^en kund offenl(eich) mit dem bri^ef alln den, die in ansehnt oder ho^erent lesn, das uns die erwi^erdign herrn, bru^eder Johans, die zeit prior ze Achspach des o^erdens von Carthus, und der gancz convent daselbs alles des gelts, des sy uns phlichtig und suldig sind gebesn von aller der arbayt, die wi^er zu irm gotsh(aws) und irem vorgenantem chloster mit glaswerich, malwerich oder wie sich das geschikt hat, volbracht haben, ga^enczleich und frewntl(eich) awsgericht habent, sagen sew des ledig und lo^es an gevêr so beschaidnl(ich), das wi^er und unser erbn noch ander nyemand von unsern wegen yeczund und fu^erbas hincz den egen(anten) herrn ze Achspach irem klo^ester, aller irer und ires gotshaus hab und gu^eetern versu^echt und unversu^echt von aller der vollbrachtn aribait, glaswerich, malberich oder wie das benant ist aller vergangn handlung dhain ansprach und voderung nicht habn sulln weder mit recht noch an recht, als wi^er in getrewleich verhaissn habn, und lu^ebn in das mit dem bri^ef, der zu einem warn urchund besiglt ist mit unserm anhangundm insigl. Gebn an sand Philipps und sand Jacobs abent der zwelifpotn nach Christ gepu^erd dreczehenhundert jar und in dem fu^enf und achczigistem jare.

Source Fulltext: FUCHS, Aggsbach (=FRA II/59, 1906) S. 77-78