In nomine domini; amen. Nos frater Symon¹ dei et apostolice sedis gracia episcopus Castoriensis notum facimus fidelibus tam presentibus, quam futuris universis, quod anno dominice incarnacionis MCCCLXXXV, pridie ydus februarii in basilica ecclesie domus beate Marie in Axpach, Carthusiensis ordinis, Pataviensis dyocesis, duo altaria de beneplacito et consensu domini nostri graciosi, domini Johannis episcopi Pataviensis, cuius officium in hac gerimus parte, dedicavimus unum in dextera parte in honore corporis et sanguinis Christi et omnium sanctorum, in quo perpetuam dei ob veneracionem et piam sanctorum memoriam recondite sunt reliquie subnotate videlicet: de tunica domini, de sepulchro domini, de lapide, in quo dominus ora^a passionis oravit et sudorem sanguineum sudavit, de lapide, in quo dominus sedit, quando cum discipulis suis cenavit, item beatorum Petri et Pauli et Jacobi apostolorum, item Mauricii et sociorum eius, Ignacii, Sigismundi, Oswaldi, Eustachii martyrum, item Augustini, Udalrici episcoporum, item Marie Magdalene, Agnetis, Ursule, Christine, undecim milium virginum; aliud altare in sinistra parte, in honorem beati Michahelis et omnium angelorum, in quo requiescunt reliquie subscripte videlicet: beatorum Andree et Jacobi apostolorum, item Laurencii, Ursi, Viti, sanctorum Thebeorum martyrum, item Innocencii pape, Augustini episcopi, item Katherine, Margarethe, Dorothee, Elizabeth, undecim milium virginum, quorum scilicet dedicacionis festum annuis revolucionibus perpetuo agendum transferimus ad diem dedicacionis ipsius ecclesie, in qua dicta altaria sunt locata. Sed quia immensa dei clemencia tunc fideles precipue pio favore prosequitur, cum ipsorum devocio sanctorum precibus adiuvatur ac Christi fideles eo frequencius ad devocionem confluant, quo ibidem dono celestis gracie refici se conspiciunt, cum igitur venerabiles et religiosi in Christo nobis dilecti dominus Johannes prior totusque conventus prefate domus devote ac humiliter supplicaverit, quatenus pro devocione ipsius domus augmentanda spiritualia munimina largiri dignaremur, nos itaque dictis supplicacionibus favorabiliter annuentes de omnipotentis dei misericordia et beatorum Petri et Pauli apostolorum auctoritate confisi omnibus vere penitentibus, qui dictum monasterium et altaria prenotata in festis videlicet nativitatis resurrexionis ascensionis domini penthecostes trinitatis corporis et sanguinis Christi in omnibus sollempnitatibus beate Marie virginis in festis singulorum apostolorum in festis sancti Michahelis, in festo omnium sanctorum necnon in festis patronorum, quorum reliquie ibi sunt recondite, et in festo dedicacionis ecclesie devote visitaverint, insuper qui predicacionibus verbi dei in capitulo monachorum vel eciam conversorum ac misse beate Marie virginis, que cottidie apud eos legitur, devote interfuerint, quadraginta dies de iniunctis sibi penitenciis prelibata auctoritate misericorditer in domino relaxamus, dummodo predicti dyocesani ad hoc concurrat consensus. In quorum omnium evidens testimonium sigillum nostrum presentibus est appensum. Datum loco anno die quo supra.^b Nos Georius,² dei et apostolice sedis gracia episcopus Pataviensis, suprascriptas indulgencias super et in quantum provide fratres sunt, ex certa sciencia confirmamus ratificamus et approbamus quadraginta dies indulgenciarum adiungentes harum testimonio litterarum sigilli nostri appensione munitarum.

Source Fulltext: FUCHS, Aggsbach (=FRA II/59, 1906) S. 75-77