Urbanus episcopus, servus servorum dei, ad futuram rei memoriam. Exigit honestas sacre religionis, sub qua dilecti filii prior et fratres domus porte sancte Marie de Axpach, Carthusiensis ordinis, Pataviensis dyocesis, devotum et sedulum exhibent domino famulatum, ut que illis pro maiori eorum comodo sunt concessa, quod illibata consistant, adiciamus apostolicmuniminis firmitatem. Exhibita siquidem nobis nuper pro parte dictorum prioris et fratrum peticio continebat, quod olim dilecti filii, nobiles viri Johannes et Georius barones baronie de Meyssaw dicte dyocesis pie attendentes, quod quondam Haydenricus baro predicte baronie eorum genitor in proprio fundo in bonis sibi a deo collatis dictam domum pro usu et habitacione perpetuis unius prioris et integri conventus fratrum dicti ordinis canonice fundaverat, sed morte preventus eam non usquequaque sufficienter dotaverat, prout necessitas exposcebat, ius patronatus parrochialis ecclesie in Gerolting dicte dyocesis, infra cuius parrochiam predicta domus consistit, quod ad ipsos Johannem et Georium legitime pertinebat, eisdem priori et fratribus sub ea condicione donarunt, ut ipsa parrochialis ecclesia dicte domui in perpetuum uniretur, prout in litteris inde confectis dictorum Johannis et Georii sigillis munitis plenius continetur, quare pro parte prioris et fratrum predictorum nobis fuit humiliter supplicatum, ut huiusmodi litteris robur apostolice confirmacionis adicere dignaremur. Nos igitur huiusmodi supplicacionibus inclinati in predictas litteras ac omnia et singula in eis contenta rata habentes et grata illa auctoritate apostolica ex certa sciencia confirmamus et presentis scripti patrocinio communimus supplentes tam, quia ubi huiusmodi littere date sunt, per earum tenorem non constat et quod eciam littere ipse per tabelliones aut testes subscripte non sunt, quam alios defectus, si qui intervenerint in premissis. Tenor vero dictarum litterarum talis est: (Folgt Nr. 79 als Insert.) Nulli ergo omnino hominum liceat hanc paginam nostre confirmacionis et supplicacionis infringere vel ei ausu temerario contraire. Si quis autem hoc attemptare presumpserit, indignacionem omnipotentis dei et beatorum Petri et Pauli apostolorum eius se noverit incursurum. Datum Perusie XIII. kalendas iunii, pontificatus nostri anno undecimo et cetera.

Source Fulltext: FUCHS, Aggsbach (=FRA II/59, 1906) S. 89-90