Ich Hans von Meissaw, obrister schenk in Osterreich, bechenn offenl(eich) mit dem brif und tu^en chund alln la^ewtn gegenwu^ertign und ku^enftign, die in lesn oder ho^eren lesn, das ich mit wolbedachtm mu^et mit gesuntn leib und mit guetn sinnen und zu der zeit, da ich es wol getu^en mocht, lauterleich durch got ze lob unser frawn Marien und alln gots heilign und ze trost meiner vo^edern und nachko^emen und meiner armen und auch alln gelaubign seln den go^etleichn brueder Johansn die zeit prior und dem ganczn convent und alln iren nachko^emen ewichleich des liebn gotshaus unser frawn Marie Carthuser o^erdn ze Achspach gelegn, genant unser frawn portn, das mein lieber vatter, her Haidenr(eich) von Meiss(aw) dem got genad erhabn von erst und gestift hat und des wi^er, ich und mein erbn hinfu^er stiftêr sein, recht und redleich geschaft und geben hab, doch von erst schaff drew hundert phunt Wienner phenning, die ich an meins liebn bru^eder Georgn von Meissaw hinndrung wol mag gebn und schaffn nach unserr briefen la^ewt, die wir ze baider seitt wolbedachtleich gen einander habn gebn, und der sy mein eribn ze hant nach meim to^ed inner ains jars frist nachst darnach unverczognl(eich) su^elln gancz und gar verrichtn und beczaln, und darzue so hab ich in gebn berait hundert phunt phenning meins gu^etz und auch darczu wil ich in demselbn gotzhaus pawen zwo zell, darinn den-selben zwain zelln nach meinem to^ed hinfu^er ewikleich phlegund und wartund sein mit gwant, mit speis, mit aller irr no^etdu^erft und zugeho^erung ze gleicher weis, als go^etleich und i^ers ordns ist, also daz der priester fu^erbas mer sein denn dreczehn, die mein vatter sêliger hat gestifft, und also su^elln ir fu^enfczehn seind und nicht mynner an gevêrd und das emphil ich iren und aller irer nachkomen trewen und gewissn. Sy su^elln auch daz gelt, die vi^er hundert phunt phenning anlegn an gu^eeter, die dann bey demselbn irm gotshaus beleibn, so si schierist mu^egn, angeva^erd, davon si dann ewikl(eich) sulln tu^en und volbringn, als das oben an dembst brief ist geschribn. Darczu^e su^elln sy auch dieselbn drew hundert phunt Wienner ph(enning), die ich in schaff mit dem brief, habn unverschaidnl(eich) auf allem dem guet, daz ich nach meim tod hinder mein lass, darczue auf allen meinn eriben und irem gu^et, wie das genant und wo das gelegn ist. Davon bit man und ru^eeff ich trewleich durch got und frewntleich all mein eribn, frewnt und nachkomen dan, das igleicher gedenk, wie lieb im wer, der im von seiner hab ze staten kêm, und tro^estt dart sein sel im leidn, das sie mein gegenwu^ertige gab und gueten willn gancz ungeirret lassen und volfueren genczl(eich), das geschribn ist an dem brief. Daran mu^egn sy meiner armen sel und meiner vordern und irn seln mit gotes gnaden ainn gu^eten trast wol erczaign. Wolten si aber des nicht volbringn, so voder ich sew oder, wer das irrt, mit dembst brif fu^er das jungist und recht gericht des zornigen richter gotes, Marie chind. Darczue ruef ich hie in der welt mit dem brief den lanndesfurstn in Osterr(eich), wer die zeit ist, und seinn gewalt an, das sy das tu^en durch got ze hail iren seln und durch der getrewn dienst willn, dy mein vo^edern und ich habn getan, und no^ettn und haltn mein eribn und frewnt oder wer daz i^erret, darczu^e, das alles das werd volbracht, das an dembst brief ist obn geschribn. Und des u^erkund gib ich denselben brueder Hannsn prior und dem convent und alln irn nachkomen und irem obgenantn gotshaus den brief ze aim warn urkund des geschêffts und der gab versigeltn mit meim anhangundn insigil. Darczue hab ich trewleich gebetn den vesten weisn ritter, hern Rennwartn vom Waltreichs,¹ das er daz gezewgt mit seim anhangundn insigil. Gebn ze Wienn nach Kristi gebu^erd drewczehn hundert jar darnach in dem newnundachczigistm jare an des heilign herrn sand Gregorgntag.

Source Fulltext: FUCHS, Aggsbach (=FRA II/59, 1906) S. 97-99