Universis et singulis presentes litteras inspecturis seu ad quos easdem contigerit pervenire, Anthonius dei gracia prepositus ecclesie omnium sanctorum alias sancti Stephani Wienne ad Romanam ecclesiam nullo medio pertinentis, Pataviensis dyocesis, executor unicus ad infrascripta a sede apostolica specialiter deputatus, salutem in domino cum bonorum omnium incremento. Litteras sanctissimi in Christo patris et domini nostri, domini Urbani divina providencia pape VI. felicis recordacionis in cordula canapi vera et integra eius bulla plumbea more Romane curie bullatas sanas integras et illesas non viciatas non cancellatas non aboletas non corruptas nec in aliqua sui parte suspectas, sed omni prorsus vicio et suspicione carentes nobis per honorabiles et religioses viros, dominos Johannem priorem nomine sui et omnium fratrum suorum domus porte beate Marie virginis in Axpach, Carthusiensis ordinis, ac nobilem virum, dominum Johannem, baronem baronie de Meissaw, predicte diocesis, coram notario publico et testibus infrascriptis presentatas nos cum ea, qua decuit, reverencia noveritis recepisse. Quarum litterarum apostolicarum tenor de verbo ad verbum sequitur et est talis: (Folgt Nr. 85 wörtlich inseriert.) Post quarum quidem litterarum apostolicarum presentacionem et recepcionem fuimus per prefatos dominos Johannem priorem et universos fratres domus porte beate Marie virginis in Axpach ac nobilem virum, dominum Johannem. baronem baronie de Meissaw humiliter devote et cum debita instancia requisiti, ut ad execucionem dictarum litterarum apostolicarum et contentorum in eisdem procedere curaremus iuxta traditam seu directam a sede apostolica nobis formam. Nos igitur Anthonius prepositus et executor prefatus volentes mandatum apostolicum nobis in hac parte directum velut obediencie filius reverenter exequi, ut tenemur, nos ad domum prefatam in persona propria contulimus ac ibidem constituti auctoritate apostolica nobis in hac parte commissa vocatis domino Johanne priore ac universis fratribus predictis et aliis quam pluribus, qui debuerunt et voluerunt et potuerunt commode interesse de contentis in eisdem litteris iuxta ipsarum litterarum continenciam et tenorem inquisivimus diligenter receptisque per nos et cum diligencia visis et perlectis privilegiis fundacionis et dotacionis factoque calculo ac racione de redditibus fructibus proventibus obvencionibus et emolumentis universis et singulis per ipsum quondam dominum Hayndenricum^a prefatum pro domo ac priore et fratribus prelibatis deputatis ac proporcionatis eisdem ad personas ipsius domus visisque auscultatis et consideratis per nos structuris ecclesie ambitus galilee edificiis et commodis singulis et universis examinatisque postmodum Johanne priore et omnibus ac singulis fratribus predictis distincte et divisim medio iuramento singulariter singulis et de super contentis in dictis litteris apostolicis ipsis et cuilibet eorum distincte et articulatim expressatis tandem per huiusmodi diligentem examinacionem inquisicionem pensacionem calculacionem auscultacionem et fratrum relacionem invenimus eandem domum pronunc sufficienter fore edificatam et dotatam dictusque baro, dominusJohannes de Meyssaw ibidem presens defuncto germano suo Georgio¹ prenominato promisit fide data nomine sacramenti, si quid in structura edificiis aut dotacione deficeret, secundum necessitatem domus predicte et ordinis consuetudinem sufficiencius dotare et edificare vellet opportunitate aut necessitate quomodolibet ingruente. Ideoque missa sancti spiritus in dicta ecclesia primitus celebrata dei nomine invocato matura deliberacione prehabita de iurisperitorum tunc nobis assistentium consilio fundacionem et dotacionem predictas auctoritate apostolica nobis in hac parte tradita confirmavimus et presentis scripti patrocinio confirmamus decernentes, ut nulli hominum liceat hanc nostre confirmationis paginam infringere vel ei ausu temerario contraire. In quorum omnium et singulorum fidem ac evidens testimonium premissorum presentes confirmacionis litteras per honorebilem virum, dominum Gundakerum notarium publicum subscriptum subscribi et publicari mandavimus nostrique sigilli iussimus appensione communiri. Datum et actum in domo porte beate Marie virginis in Axpach predicta in choro ecclesie ibidem anno domini millesimo trecentesimo nonagesimo tertio die vicesima septima mensis ianuarii hora tertiarum vel quasi, indiccione prima, pontificatus sanctissimi in Christo patris et domini nostri, domini Bonifacii divina providencia pape VIIII anno quarto, presentibus religiosis viris, dominis fratre Ortorlfo Lautterpeck, priore domus throni beate Marie virginis in Gêmnico,² fratre Heinrico priore domus vallis omnium sanctorum in Maurbaco,³ dicti ordinis Carthusiensis, Pataviensis diocesis, ac honorabilibus viris, dominis Leonhardo dicto Schaur, licenciato in decretis, Ratisponensis et Pataviensis ecclesiarum cantore, et magistro Nicolao Relgern, baccalario in decretis, clerico Magdeburgensis diocesis, testibus ad premissa vocatis specialiter et rogatis. ^b (S. N.) Et ego Gundakerus Aspeck de Obernperg,⁴clericus Pataviensis dyocesis, publicus imperiali auctoritate notarius, rector parrochialis ecclesie in Lasperig,⁵ iam dicte diocesis, ac scriba dicti domini prepositi et executor predictarum litterarum apostolicarum presentacioni earumque recepcioni requisicioni prenominatorum fratrum vocacioni inquisicioni privilegiorum visioni et leccioni ac etiam calculacioni et racioni proporcioni, auscultacioni consideracioni fratrum relacioni examinacioni iuramenti prestacioni predictique domini Johannis, baronis baronie de Meissaw, promissioni et tandem prenominati domini prepositi et executoris confirmacioni ac decreto omnibusque aliis et singulis premissis, dum sicut premittitur per eundem dominum prepositum et executorem atque coram eo agerentur et fierent, unacum prenominatis testibus presens interfui eaque omnia et singula sic fieri et agi vidi et audivi ideoque de mandato predicti domini prepositi et executoris presentes confirmacionis litteras sive hoc presens publicum instrumentum per alium me aliis occupato negociis fideliter scriptas sive scriptum exinde confeci ac publicavi manu mea propria hic me subscribendo signoque et nomine meis solitis et consuetis unacum sepenominati domini prepositi et executoris sigilli appensione signavi rogatus et requisitus in fidem et testimonium omnium et singulorum premissorum.

Source Fulltext: FUCHS, Aggsbach (=FRA II/59, 1906) S. 120-123