Ich Jo^erig Mu^olfelder vergich und tu^on kund [allen lêwten]^a gegenbu^ertigen und chunftigen, das fu^er mich [komen]^a sind die erberen und weisen die gesworn von S[tifen]^a und gaben mi^er zu erchennen, wie der edel, mein genediger herr von Meissaw und der erwi^erdige und geistl(eiche) mein gena^ediger herr, der prior von Achspach mit in geschaft hieten, das sew U^ellein dem Vaschang an aÿnem tail und Enderlein dem Frawndarfer an dem andern tail des landes recht sprachen und yedem tail widervaren liessen und darumb unser gena^ediger herr, der prior yedem tail czway und dreizzigk phunt phenning aufsaczt, wer auz dem rechten trêt, der wer im der gevallen und dem edeln unserm gena^edigen herrn, hern Otten von Meissaw auch zwayunddreizzikg phunt phenning, und des verfiengen sew sich also. Do sprachen dew geswaren das recht trewlich und ungevêrdlich das pest, so sew chunden und westen und da trat der Faschang auz und wolt dabey nit beleiben. Des erchlagten sew sich meinem herren. Da schueff der edel mein gena^ediger herr von Meissaw mit mi^er, ich solt den Vaschang vahen und i^en darczu^ehalden, das er dabey belib, als es dew geswaren zu dem rechten gesprochen hieten, und dew XXXII. lib. den. von im nêmen. Des ward der Faschang inne und weich awz dem darff. Darnach chom der Sporenranst des Faschang o^ehem und bat mich, das ich aynen tag fu^er meinen herren machtt, und die gesworen begerten sein auch fu^er meinen herren zu cho^emen. Das verginge sich also, das ich mitsambt in gen Horn chom. Da macht mein herre die mu^ezz nit gehaben, das er sew verho^ert hiet, und schuef mit mir und dem schaffer, das wir dew sach verhoren solten und dann ga^enczl(eich) awssprechen. Da versprach mir der Sparnranst, was wi^er sprêchen, da mu^eest U^ell Faschang gênczl(eich) bey beleÿben, und da wolt er mit leib und mit .... [peleiben].^a Do sprachen wir von erst, das U^ell Faschang und Andree Frawndorffer gu^et frewnt mit einander sollten sein. Darnach da sprache wi^er, das man von der varunden hab solt gelten. Auch sprachen wir, daz U^ell der Faschang das chind solt innehaben und sein gůt und sol auch dem chind sein guet bey rechtem gůeten paw halden. Wêr aber, daz der vorgen(ante) U^ell Faschang dem chind sein můeterleich erib wolt verderiben lazzen und daz nicht bey rechten gůetem paw hielt, so sullen des chinds nachst frewnt von der můeter sich des guetz u^enderwinden und sullen das pawen, unczt daz daz chind zu seinen jaren kumbt, so sullen sew dann dem kind sein gu^et inantbu^erten und auch ob icht nu^eczzen von dem gu^et gevallen wêren, daz stet zu iren trewn mit urkund des briefs versigelt mit mein selbs Jo^erigeins des Mu^elfelder, die zeit phleger zu Gars¹ aufgedruchtem insygil. Geben zu Gars anno etc. CCCCXII.

Source Fulltext: FUCHS, Aggsbach (=FRA II/59, 1906) S. 218-219