Wir Fridreich von gotes gnaden ro^emischer ku^enig, zu allen czeiten merer des reichs, herczog zu O^esterreich, zu Steir, zu Kêrnden und zu Krain, grave zu Tirol etc., bekennen als wir nachst durch anbringung des ersamen geistleichen unsers lieben andêchtigen des prior zu unsrer frawn porten zu Achspach von zwair geltschuldbrief wegen, darinne sich vor czeiten Hanns von Meissaw fu^er sich und seine erben zu gelter verschriben hat umb vierhundert phunt phennyng, demselben goczhaus und klasterlêwten auszurichten ettliche gu^eter und stu^ekh, so weilnt Ott von Meissaw hinder sein gelassen hat, geschafft haben inzeantwurtten und der zu niessen nach inhalt unsers briefs von uns darumb ausgegangen, also sind fu^er uns ko^emen unser lieb getrew Lewpold von Ekarczaw¹ und Cristoff von Liechtenstain zu Nicolspurg und haben uns fu^erbracht, wie daz sy als geschêfftherren des egenanten von Meissaw zu erstattung der obgeschriben geltschuld, auch durch geschêfft des egenanten von Meissaw dise nachgeschribne stu^ekh und gu^eter dem obgenanten goczhaws zu^egeaigent und gegeben haben, und uns gebeten, daz wir mit unserm getrewn Thoman dem Kolben, der egenanten von Meissaw diener, der die obgenanten gu^eter innehat, zu schaffen, die zu des egenanten prior und seins goczhauss hannden uberczeantwurtten. Das haben wir getan und haben demselben Kolben geschriben und empholhen, im der abzutretten, also daz derselb prior und seine nachkomen und convent daselbs zu Achspach dieselben gu^eter mit irn zu^egeho^erungen mitsambt den andern in dem ersten unserm brieve begriffen nu^e fu^erbazzer in aigens weis innhaben nu^eczen und niessen und irn frumen damit schaffen su^ellen und mu^egen als mit andern irn aigen gu^etern, die zu demselben irm goczhaws geho^ernt, und sind das die egenanten stu^ekch und gu^eter: von erst zu Spicz auf behausten gu^etern und o^edrechten bey nêwn schilling phennyngen, item ain weingarten, genant die Raubergerin, item ain weingarten, genant der Huntaff, item ain weingarten, genant der klain Ku^enringer, item ain weingarten, genant der gross Ku^eringer, item und ain weingarten, genant die Pewnt, under dem hause² zu Spicz. Mit urkund des briefs geben zu Wyenn an samcztag nach sand Margrethen tag nach Krists geburd vierczehenhundert und darnach in dem ainemundvierczigistem iar, unsers reichs im andern iare.

Source Fulltext: FUCHS, Aggsbach (=FRA II/59, 1906) S. 281-282