Ich Hanns Schawer gesessen zu Seitterndorf, ich Kathry Hannsen des Mayr zu Seitterndorf eleiche hausfraw, ich Elspett Kolmans des Lueffen zu Tölan eleiche hausfraw, alle drew geswistred, bïr bekennen offenlich mit dem brief füer uns und all unser erben und tun mënigkleich künd allen leuten gegenbürtigen und künftigen von aller der züsprüch und vadrung wegen so wir gehabt haben hinz meins obgenanten Hannsen rechter vater und unser obgenanter baider s wester stewfvater Stephan dem Schawer zu Seyttrendorf von alles des güts und hab wegen so unser liebe rechte mueter Margreth sein erere eleichew hausfraw, der got genad, in sein gewaltsamb bracht hat, es sei erib oder varundgüt oder was sew baide miteinander mit gesambter hant erkauft erarbait und zuwegen bracht haben und was des die obgenannt Margreth unser rechte müeter mit tod hinder ïr gelassen hat, nichts darinn ausgenomen und besunderleich von der hernach beschriben stü[kch]¹ grünt und güeter wegen: von erst das lehen zu Seitterndorf gelegen zu nagst Vlreichs de[s T]anner lehen daselbs davon [man jër]leich dient zu dem erwirdigen gotzhauß gen Agspach Unsrer frawn porten Charttüser or[dens] ain halb phunt phenning [an] sand Michelstag und die halb wisen im Nassenlach, davon man dient dem pharrer zu Lostorf drei helbling und die wisen zu Cherbach, davon man dient Jorigen des Höchstetter seligen chinder in iren hof zu Seyttrndorf virdhalben phenning und ain acker zu Mörens in Rewtern, davon man jerlich dient gen Eberstarf auffem perg in den ambthof vier phenning, und ain acker zu Tolan in Reutteren, davon man dient newn phenning; die ieczbenanten purkrecht dient man albe² an sand Michelstag. Die ieczbenanten stükch grünt und güeter habent die obgenanten unser rechter vater und stewfvater und unser rechte müeter baide miteinander gekauft, und dieselben halbe mit halber zugehörüng wa^eren nach des obgenanten unsers vater und stewfvater mit³ todauf uns obgenante geswistred gefallen, was uns zu unsrem tail und unseren erben darinn rechtlich gepuret hiet von erbleicher gerechtikait wegen. Umb die vorgenanten züsprüch vadrüng wartüng und gerechtikait all, so wir oder unser erben darinn gehabt hieten oder hinfuer gehaben hieten mogen, darumb habent uns frumb erber weis leut baidtail mit unser baidertail willen und wissen miteinander gericht und geaint, dabei es hinfu^er beleibn schol an all auszüg getrewlich und ungeverlich, also das uns der obgenant unser rechter vater und stewfvater fuer die vorgemelten unser züsprüch vadrung und wartung ain beraite sumb gelcz gegeben hat, der wir von im und seiner eleichen hausfrawn Elspeten ganz und gar gericht und bezalt sein zu rechten tägen an allen schaden. Darumb so verzeich wir uns der obgenanten stükch grünt und güeter aller, daengegen chain züsprüch zu haben weder mit recht noch an recht, geistleich noch weltleich in chainerlai weis ungeverleich, dann ausgenommen, ob mir obgenanten Hanns Schawrer der tod icht geb, das ich rechtleich erben schol von vätterleichs erbtails. wegen, des verzeich ich mich nicht. Es schölln und mögen auch der benannt Stephan Schawrer, Elspet sein hausfraw mit den benanten stukchen und grünten und mit aller varunden hab damit schaffen all ir frümb mit verseczen, verkaufen, schaffen, machen und geben wem sew wellen an uns, aller unser erben und an mênigkleich[s vo]n¹ unsern wegen irrung und hindernüss ungeverlich. Besche^ach aber das in icht krieg oder ansprach darinn auferstüenden, es wär von uns, unsern erben oder von wem das wär von unsern wegen, das sew zuschaden ka^emen mit dem rechten, dieselben sche^aden schüllen sew haben und der bekomen zu uns, all unseren erben und darzu auf all unsern erben und gu^ette[rn so]² wir haben gewünen oder hinder unser lassen, nichts darinne ausgenomen; davon mögen sew aller irer scheden beköm[en]³, so sew nachst und rechtlichist mögen, das ist unser guttlicher will an all auszüg und widerred getrewlich und ungeverlich, wir sein lembtig oder tod. Und des zü urkund geben wir obgenante geswistred für uns und all unser erben den offenn brief dem benanten Stephan Schawrer meins obgenanten Hanns Schawrer rechter vater und unser baider swestern stefvater und Elspeten seiner eleichen hausfrawn und iren beiden erben besigelten mit des erwirdigen geistleichen herren hern Thomann prior des obgenanten gotzhauss zu Agspach anhangunden insigill, darumb wir in mit vleiss gepeten haben, doch im und seim gotzhaus an schaden und an iren rechten unvergriffenleich, darhinder wir uns obgenante geswistred verpinden mit unsern trewn an aidestat, alles das war und stet zu haben das an dem brief geschriben stet, und besigelt mit der edeln frawn, frawn Vrsula Fridreichs des Hochsteter seligen witib anhangunden insigel, gerhaberinn des obgenanten Höchsteter kinder, ir und iren erben an schaden und den benanten kinden an irem purkrecht unvergriffenlich; und das bezeugt durch unser vleissigem pet willen der edel vest Thoman Kolb mit seinem anhangunden insigil, auch im und sein erben an schaden. Geben an phinztag vor dem pluemöstertag, nach Kristi gepürd virzehen hundert jar und darnach in dem siben und fünfzigistem jare.

Source Fulltext: LAMPL, Nachträge (1907) S. 214-216.