Udalricus dei et apostolicae sedis gratia episcopus Pataviensis ad futuram rei memoriam. Pastorali cura conmoniti ad ea oculos nostrae mentis diligentius convertimus, per que fidelium devotio ad cultum divinum aliaque pietatis opera ferventius excitatur. salus procuratur animarum nobis comrnissarum. Sane pro parte dilectorum in Christo Georii rectoris parrochialis ecclesie in Gerolting¹ nostrae diocesis ac plebis seu parrochianorum eiusdem nobis est expositum, quod licet festum dedicationis memoratae ecclesiae annis singulis ex primaeva institutione dominica proxima post festum s. Johannis baptistae institutum et post succedente tempore ex quibusdam causis tunc occurrentibus in dominicam tertiam post festum resurrectionis, qua in ecclesia dei canitur: iubilate deo, translatum fuerit, nihilominus tamen Christi fideles aliunde ex circumiacentibus ecclesiis et locis antiquae institutioni huius festivitatis inhaerentes ipsam ecclesiam duntaxat dominica praefata post festum s. Johannis baptistae visitare solent credentes se ex primaeva institutione ea die indulgentiarum dedicationis ipsius ecclesiae participes fieri. Ne igitur ea veterana consuetudine ipsi Christi fideles illinc confluentes illo indulgentiarum thesauro priventur ipsumque dedicationis festum decentiori veneratione honoretur et peragi valeat, hinc humiliter et devote supplicant, quatenus ipsum festum dedicationis vice versa in dominicam post festum Johannis baptistae auctoritate nostra ordinaria transponere et transferre dignaremur. Nos itaque huiusmodi petitionem iustam, rationi denique consonam fore censentes dedicationis festum ecclesiae parrochialis in Gerolting a dicta dominica: iubilate deo, tollentes ipsum ad proximam dominicam post festum s. Johannis baptistae et primaevam eius institutionem cum omnibus et singulis ceremoniis indulgentiis et remissionibus ad id concessis sive in posterum concedendis celebrandum, auctoritate nostra ordinaria transponendum duximus et transferendum atque transponimus et transferimus per praesentes volentes et decernentes praedictum dedicationis festum annis singulis perpetuisque temporibus suppliciter et solempniter dominica memorata celebrari ac omnes et singulos Christi fideles ea die ipsam ecclesiam devote visitantes omnium indulgentiarum et remissionem ad eamdem quomodolibet concessarum et concedendarum participes fieri harum, quibus nostrum sigillum appensum est, testimonio litterarum. Datum Wyenne die vicesima prima mensis iunii anno domini millesimo quadringentesimo quinquagesimo septimo.

Source Fulltext: FUCHS, Aggsbach (=FRA II/59, 1906) S. 310-311