In nomine sanctae et individuae trinitatis. Heinricus divina favente clementia Romanorum imperator augustus. Quoniam ex iure suscepti regni omnibus ecclesiis Romani imperii debitam sollicitudinem debemus impendere, volumus, unamquamque, quantum nobis ex divinae gratiae munere coneditur, procurare et ad dei servitium promovere. Unde quidem omnes Christi nostrique tam futuri quam praesentes noverint fideles, qualiter nos pro animae nostrae felicitate et antecessorum nostrorum requie et ob interventum nostri thori ac regni consortis scilicet Agnetis imperatricis augustae, et ob devotam servitutem nostri fidelis et dilecti Nitkeri Frisingensis episcopi ad altare sanctae Mariae semper virginis sanctique Corbiniani confessoris in monasterio Frisinga tale praedium, quale Ulrich et Ascwin in Ardack in comitatu marchionis Adalberti trans fluvium Ensa, habuerunt, iure gentium nostrae potestati dicatum, tradidimus cum omnibus suis pertinentiis, cum mancipiis scilicet utriusque sexus, areis, aedificiis, agris, pratis, campis, pascuis, terris cultis et incultis, silvis, venationibus, aquis aquarumque decursibus, molis, molendinis, piscationibus, exitibus et reditibus, viis et inviis, quaesitis inquirendis et omni iure et utilitate, quae ullo modo poterit provenire, ea videlicet ratione et conditione, ut praefatus episcopus et sui successores in praedicto loco Ardacher clericos seculares ad dei servitium pascant et sustenten regulari praebenda in honorem sanctae Margaretae virginis et martyris ibidem constitutos et congregatos. Et ut haec nostra imperialis traditio stabilis et inconvulsa omni succedentis temporis aevo permaneat, ideo hoc praeceptum inde conscriptum manu propria corroborantes sigilli nostri impressione iussimus insigniri. Termini autem praefati praedii isti sunt: Ab Holesceit usque in Sambach. A Sambach usque in Tieufenpach. Data VII. Idus Januarii anno dominicae incarnationis MXLIX indictionis II. anno autem domini Heinrici tercii regis imperatoris II. ordinatione ejus XX. regni quidem X. imperii autem III. In nomine domini actum Ebersperg feliciter. Amen.

Source Fulltext: FRIESS, Ardagger (AÖG 46, 1871) S. 466-467