Otocharus dei gratia dominus regni Boemiae dux Austriae et marchio Moraviae. Vniuersis per totam Austriam constitutis salutem et omne bonum. In nostra constitutus praesentia dilectus cappellanus noster Lupoldus venerabilis praepositus Ardacensis nobis proposuit, quod olim in foro Ardacensi erant nundinae annuales in festo sanctae Margaretae, quae singulis annis per duos menses et interdum amplius durauerunt ibidem. Erat etiam ibidem forum ebdomadale omni scilicet die Sabbati, et cum nundinae inde sublatae fuerunt, forum etiam ebdomadale cessavit. Nos autem hiis plenius intellectis ad instantiam precum memorati Liupoldi praepositi forum ebdomadale eidem loco restituimus, omni scilicet die Sabbati sicut consuetum fuit hactenus celebrandum, auctoritate praesentium statuentes, ut omnes, qui voluerint, forum ibidem visitent omni die Sabbati, nisi festum impediat valde magnum, omnia jura et consuetudines antiquas testimonio praesentium tribuentes, libertatem et jus, quod olim habuerunt praepositi illius loci, in nullo penitus minuentes. Super quo damus in testimonium et cautelam praesentes nostras litteras et sigillum, testibus subnotatis. Otto comes de Paylstayn, Otto nobilis de Plevncz, Albero de Chunringen, Heinricus de Habespach, Chunradus de Hintperch, Otto de Myssowe, Chunradus de Ceckingen, Zmilo de Luchtenburch, Wocko de Rosenberch, Benesius et alii quam plures. Datum in Wienna in die sancti Andreae, anno domini millesimo ducentesimo quinquagesimo sexto.

Source Fulltext: FRIESS, Ardagger (AÖG 46, 1871) S. 479