Ne illa, quae aguntur in tempore, sint labentia cum tempore, et ne cum caducis cadant, prudentum providit cautela hominum gesta contra oblivionis periculum scripturae testimonio reborare. Hinc est, quod ego Hermannus, permissione divina Ardacensis ecclesiae praepositus, constare cupio tam praesentibus, quam futuris, ad quos pervenerit praesens scriptum, quod ego huebam meam sitam apud Chalmunz an dem Aigen, quam emi cum mea pecunia videlicet pro XXIV libris Wiennensium denariorum, legavi, disposui ac ordinavi ob remedium animae meae post mortem meam fratribus ac canonicis ecclesiae Ardacensis ita videlicet, ut postquam me ab hac vita decedere contingat, ipsi fratres huebam praefatam cum omnibus juribus et utilitatibus suis ad usus fratrum communes in perpetuum ordinent ac disponant, hoc modo apposito et adjecto, ut in die nativitatis beatae virginis mediam partem omnium proventuum ejusdem huebae, qui tunc cellarius fuerit, inter canonicos dividat, qui fuerint tunc praesentes, mediam vero partem omnium proventuum de praefata hueba in translatione beati Coirbiniani confessoris atque pontificis distribuat inter canonicos, qui missarum solemniis ac aliis horis eodem die solemniter celebrandis interfuerint tunc praesentes. In cujus rei testimonium praesens scriptum mei et capituli duxi Sigillorum munimine roborandum. Acta sunt haec anno domini millesimo ducentesimo nonagesimo tercio, octavo Kalendis Julii.

Source Fulltext: FRIESS, Ardagger (AÖG 46, 1871) S. 486