Iniuriatur nonnunquam oblivio memoriae, et longinquitate saepe fit temporis, ut res clara praesentibus, obscura reddatur posteris et futuris. Ideoque ne illa, quae aguntur in tempore, simul labantur cum tempore, et ne cum caducis cadant, et cum decedentibus decedere videantur, prudentum providit cautela hominum, gesta contra oblivionis periculum scripturae testimonio roborari. Hinc est, quod ego Hermanus, permissione divina Ardacensis ecclesiae praepositus. constare cupio tam praesentibus sentibus quam futuris, ad quos pervenerit praesens scriptum, quod ego hubam sitam in dem Chalmuntzpach, quam cum mea pecunia videlicet pro XVIII libris Wiennensium denariorum comparavi, legavi, disposui ac ordinavi ob remedium animae meae post mortem meam fratribus ac canonicis ecclesiae Ardacensis ita videlicet, ut postquam me ab hac vita decedere contingat, ipsi fratres hubam praefatam cum omnibus iuribus et utilitatibus suis ad usus fratrum communes in perpetuum ordinent et disponant, hoc modo apposito et adiecto, ut in die seu in anniversario obitus mei singulis annis ipsi fratres cum choro cantent vigilias mortuorum et missam celebrent pro defunctis, illaque die de censu ejusdem hubae qui tunc custos ecclesiae fuerit, sex solidos denariorum inter canonicos, qui tunc eisdem exsequiis interfuerint, dividat et alios sex solidos in die beati Corbiniani confessoris atque pontificis distribuet inter canonicos, qui missarum sollempniis et aliis horis eadem die sollempniter celebrandis interfuerint tunc praesentes. Insuper et praedictus custos omnes proventus, qui de eadem huba poterunt provenire, inter canonicos eisdem diebus dividat tunc praesentes. Si autem, quod absit, ipsi canonici, qui tunc praesentes fuerint, in exsecutione eorundem officiorum extiterint negligentes, habebit praepositus, qui tunc fuerit, liberam potestatem, trina tamen admonitione praemissa, eandem hubam sibi ac suis usibus applicandi. Ad haec quamdiu vixero et eandem hubam tenuero LX denarios in die beati Corbiniani in signum ordinationis meae inter canonicos, qui eodem festo matutinis, vesperis et sollempnibus missarum interfuerunt, decrevi de praedictae hubae proventibus dividendos. In cujus rei testimonium praesens scriptum mei et capituli duxi sigillorum munimine roborandum. Acta sunt haec apud Ardaker anno domini MCCLXXXVIII decimo septimo calendas Aprilis.

Source Fulltext: FRIESS, Ardagger (AÖG 46, 1871) S. 484-485