Ne ea, quae pro salute animarum fiunt, in irritum revocentur, ipsa necessario literarum testimonio confirmantur. Hinc est, quod ego Chunradus, miles dictus Steuensharder notum facio tam praesentibus quam futuris cyrografum per praesentem, quod sana mente et imbecilli corpore meorum haeredum omnium de consensu dotavi et legavi pro remedio animae meae ecclesiae beatae Margaretae in Ardacher VI solidos in reddituum annua pensione, videlicet IX denarios de agro dicto in Pruch. quem tenui libere jure proprietario et possedi, et mediam libram super feodo quodam, quod comparaui sive emi pro VI libris ab universitate capituli ecclesiae prius dictae, sito in barrochia fidelium Neunhouen et idem mansus nuncupatur vulgariter an der wise iuxta Reudennich. Haec vero conditione tali tribui et donavi. ut me viuente singulis annis in die beati Cholomanni meae et meorum parentuni exequiae peragantur cum missa defunctorum et vigiliis mortuorum a confratribus ecclesiae suprascriptae, me vero sublato de medio iam tactae exequiae in meo anniversario peragantur. Et quicumque cellerarius dominorum canonicorum fuerit, praedictos VI solidos inter canonicos dividat, qui praesentialiter missam et vigilias fuerint peragentes. Testes vero, qui quantum ad hoc meae ultimae voluntatis testamento interfuerunt, sunt, quorum nomina subsecuntur: dominus Chunradus dictus Ferco, canonicus in Ardacher, dominus Otto canonicus ibidem et plebanus in Amsteten, dominus Hainricus Slurfo canonicus ibidem, dominus Stephanus canonicus dictae ecclesiae et plebanus in Gemnich, Nicolaus scolasticus et canonicus loci praedicti, dominus Hainricus plebanus in Zeidlaren, Otto de Reichkerstorf, Chunradus Pugil et alii fide digni. Datum et actum in Ardacher in curia praepositi anno domini MCCCVIII in die ascensionis domini.

Source Fulltext: FRIESS, Ardagger (AÖG 46, 1871) S. 491