Ich Fridreich der Straicher, goltsmid vnd purger ze Wyen, vergich offenlich an disem brief allen den, die in sehent oder horent lesen, daz di erbern heren, mein herre, her Vlrich von Massenhausen probst des gotzhaus ze Ardakcher vnd das Capitel daselb, di pfrund, di auf dem selben chor ledich worden ist von des erbern heren hern Otten des Wolfstein tod, dem got genad, meinen sun Mertein geantwurt vnd gegeben habent durich got vnd durich der ersten pet willen meines genedigen heren hertzog Fridreichs von Oesterreich, dem Got genedich sei, vnd auch durich meins genedigen heren hertzog Albrecht pet willen mit solher weschaidenhait, daz ich vnd mein vorgenant sun Mertein vnuerschaidenlich vns verpunten haben vnd verpinten mit vnsern trewen, daz wir di vorgenanten pfrund verantwurden vnd versprechen sullen an aller stat gegen allen den, di auf die genanten pfrund dhainerlay rechten gehent oder fur gebent, also daz daz vorgenant gotshaus ze Ardakcher vnd auch die genanten heren, der probst vnd das capitel da selb, an allen iren schaden vnd mue vnbeswart beleiben, war aver, daz in da von dhain schad oder prest auf gestund, wi der geschehen mocht, den sullen wir im gantz vnd gar ablegen an alle widerred. Vnd daz in daz stet vnd vnzebrochen beleib, gib ich in diesen brief versigeltem mit meinem anhangendem jnsigel vnd auch mit meines besundern heren, hern Philippes des abts datz den Schotten ze Wyen anhangendem jnsigel, der daz durch meiner pet willen, daran gehencht hat im an Schaden, darunter auch sich mein egenanter sun Mertein mit sampt mir verpint, allez, daz stet ze behalten, daz oben an diesem brief verschriben ist. Der brief ist geben ze Wyen, do man zalt von Christs gepurtt tausent iar drev hundert iar dar nach in dem funf vnd vierzigsten iar, des nachsten vreytages vor sand Lambrechts tag.

Source Fulltext: FRIESS, Ardagger (AÖG 46, 1871) S. 501-502