Wir Otto graf ze Schaunberch vnd probst ze Ardacher veriehen vnd tuen chund allen den, di disen prif sehent, hoerent oder lesent, di nu lebent, oder her nach chunftig sint, daz fuer vns vnd fuer vnser capitel ze Ardacher ist chomen der erbar ritter her Walther, ze den zeiten purgraf ze Seusnekk, vnd hat nach seiner pesten vreunt rat vnd mit allen sein erben guetlichem willen vnd rat ze der zeit, do er iz wol getuen mocht, den hof, der da haizzet der freynhof gelegen pey Seusnekk, vnd den er gehabt ze rechtem lechem von vns vnd von vnserm gotzhaus, lautterleich vnd gentzleich aufgeben hat innerchleich durch got zu einem ewigen selgeret vns vnd vnserm gotzhaus ze Ardacher mit allen den rechten vnd nutzen ze holtz vnd ze ueld, versuecht vnd vnuersuecht, di durch recht dar zue gehorent, also mit der peschaiden, daz wir mit vnsers capitels rat vnd willen vnd mit rechter fuertrachtung dem vorgenanten hern Walthern vnd dem capitel ze Ardacher den obgenanten hof aufgeben haben die aygenschaft mit solicher beschaiden, daz man vns dem probst vnd allen vnsern nachchomen da von dienen schol alle iar sechtzig Wienner phenning, vnd waz der hof vber di sechtzig phenning nutz vnd geltz tragen mag, daz schol gantz vnd gar ze Ardacher auf den chor in das oblagium dienen in allem dem recht, als man in ander ir guet in daz oblagii dient. Iz schol auch vnser vorgenantz capitel das selgeret vnd den gotzdienst alle ierleich vntzebrochenleich gantz vnd stet behalten, als dem vorgenanten hern Walthern von dem selben capitel verschribn ist. Vnd daz di vor geschriben sach stet vnd vntzebrochen von vns vnd von vnsern nachchomen beleih, geb wir disen prief versigelten mit vnserm anhangundem insigel. Der prief ist geben datz Schounberch, da man zalt von Christes geburd dreutzehen hundert iar darnach in dem dreu vnd viertzkisten iar, an sand Johans tag gotes tauffer.

Source Fulltext: FRIESS, Ardagger (AÖG 46, 1871) S. 500-501