Nos Albertus dei gratia episcopus Frisingensis recognoscimus et tenore praesentium confitemur, quod litteram suprascriptam sigillo honorabilis in Christo Chunradi comitis de Schaunberkh praepositi et capituli ecclesiae Ardacensis Pataviensis dioecesis sigillatam et subscriptam ac signo debito et consueto discreti viri Chunradi Ulrici de Lintz, clerici Pataviensis dioecesis publici authoritate imperiali notarii consignatam vidimus ac de verbo ad verbum legimus et inspectione diligenti consideravimus et solerti, ita quod omnia et singula de verbo ad verbum in littera praescripta contenta cui haec littera nostra est affixa tamquam ille, ad quem jus patronatus seu jus praesentandi praedictae praepositurae ecclesiae Ardacensis dignoscitur pertinere, approbamus, confirmamus et laudamus, et ratam esse volumus perpetuis temporibus atque firmam reservantes nihilo minus nobis et ecclesiae nostrae Frisingensi omnia jura et consuetudines, quae et quas de jure et consuetudine in dictam habere dignoscimur ecclesiam Ardacensem. In cujus confirmationis evidens testimonium praesens nostra littera huic praesenti litterae est affixa et nostri sigilli munime sigillata. Datum in castro nostro Enzisdorf anno domini millesimo, trecentesimo quinquagesimo septimo in vigilia beati Matthiae apostoli.

Source Fulltext: FRIESS, Ardagger (AÖG 46, 1871) S. 523