Wir Rudolf von gotes gnaden herzog ze Oesterreich, ze Steyr und ze Kernden, herr ze Chrain, auf der Marich und ze Porttnaw, graf ze Habspurch, ze Phirt und ze Kyburch, marichgraf ze Purgow und lantgraf in Elsazz. Wan der ehrwürdig bischof Johann von Gurek unser liber Kanzler und unser getrewer Friedlieb official und chorher ze Passau gar erberlich und ordentlich um all stozz, kriech und misshelichkeit, di zwischen den propst und den Chorherren von Ardacher waren und die an si gesezt sind, ausgesprochen haben als der spruchbrif bedeut, der darüber geben ist, und wir desselben gotshaus ze Ardacher obrister vogt und her seind, haben wir den egenanten spruch mit fürstlichen gewalt bestetigt und bestetigen auch mit disen brif, und wellen, daz der probst und die chorherrn daselbst ze Ardacher, wer di ze den zeiten sind, denselben spruch ewigleich stat haben und alle gesectze, di darin verschrieben stehent, fleizziglich behalten und volfüren in aller mass, als der obgenannt spruchbrif sagt, der darüber geben ist. Mit urkund des brif geben ze Wiene am samstag vor sand Niclas tag nach Christi geburt dreyzehen hundert iar darnach in dem ein und sechzzigisten iaren unsers alters in dem dreu und zwaintzigisten und unsers gewaltes in dem vierten iar. Wir der vorgenannt herzog Rudolf Sterken disen prief mit dirr underschrift unsers selbs hant.

Source Fulltext: FRIESS, Ardagger (AÖG 46, 1871) S. 523-524