Gotfridus dei gratia Patauiensis episcopus. Ad perpetuam rei memoriam. Libenter vnanimitati, concordiae et quieti subditorum nobis et maxime ecclesiasticarum personarum, in quantum nobis ex alto conceditur, consulimus et etiam tranquillitati pacis eorundem, vt ex officij nostri debito teneri dignoscimur, pro nostris viribus prouidere diligentius conamur, recensentes ex euangelicae veritatis testimonio: ,beati sunt pacifici quoniam filii dei vocabuntur.' Cum igitur inter. . . praepositum et capitulum collegii Ardacensis nostrae diocesis diuersae iam multis retroactis temporibus et supra diuersis articulis ortae sint litium quaestiones, quae tamen consentiente venerandae memoriae domino Alberto olim episcopo Frisingensi, nec non de beneplacito unanimi et consensu bonae memoriae Chunradi de Schownberch ex tunc praepositi et canonicorum ac totius capituli ibidem per quasdam constitutiones seu statuta satis venerabilia sopite videntur, licet suceessu temporis de praefatis constitutionibus seu statutis lites ortae fuerint variae et diuersae; nos qui voluntarie sollicitudinis labores amplectimur, ut subditis nostris quietis commodum procuremus, dictas constitutiones seu statuta sicut rite, prouide et venerabiliter facta sunt, ad petitionem et deuotam instantiam canonicorum et totius capituli supradictorum auctoritate ordinaria approbamus, ratificamus et confirmamus, ac robur habere volumus perpetuae firmitatis. In quorum omnium et singulorum testimonium praesentes appensione sigilli nostri mandauimus comuniri. Datum Wiennae, die sanctorum Innocentium, anno domini milesimo trecentesimo sexagesimo secundo.

Source Fulltext: FRIESS, Ardagger (AÖG 46, 1871) S. 525-526