Ich Niclas Meyenwald pharrer zu sant Georgen auf dem Ibisueld bekenn offenbar an dem brief allen lewten, den er furkumpt, das ich willikleich vnd gern vnd durch besundrer gnaden vnd fudrung willen di mir di erwirdigen vnd geistleichen herren, her Eglolf brobst, her pauls techant vnd das ganz capitel sand Margarethen gotshaws ze Ardakcher getan habent, wann sew mich zu der chorherphruend, die yezt mit hern Hannsen Münch selig weilent techant vnd chorher doselbs tod ledig ist worden, gern vnd lobleich nach meinen pebstleichen brief lawt vnd rechten zu irem korpruder nach irs gotshaws rechten vnd gewonhaiten aufgenommen habent, als vil vnd ich rechtens dorzu hab oder gewinnen mag, vnd habent mich auch der selben phrünten ze nutz vnd gewer gesatzt aller andern wartter rechten vnengolten, dorvmb ich gelubt vnd auch redleich versprochen hab vnd versprich auch in das also mit chraft des gegenwertigen brifes, das ich die obgenante mein phrund mit meinen aigen gut schermen, versprechen vnd verantworten sol vnd wil mit dem rechten, ez sey ze Rom, hye ze land, oder anderswo, vor firsten bischolfen oder andern gewelten an allen steten, widder all anschlag, wo mir oder in des not vnd dingt geschieht an all meiner egenanten herren vnd chorprudern vnd dem gotshaws gentzleich an schaden. Stund in aber oder dem gotshaws do widder chainerley ansprach sprach oder chrieg von der benanten mein phrund wegen icht auf, von wem sich das geb oder wy sich das fuget, der ansprecher hab recht oder nicht recht, das sol vnd wil ich alles verantworten an allen den steten, vnd es gemeldt ist den herren vnd dem gotshaws an allen scheden als vor geschriben stet. Swas sew aber oder das gotshaws doruber scheden nehmen, ez wer mit nachraysen, zerung vnd potenlon, wy di scheden genant wurden, iren oder ir ains slechten worten dorvmb ze glawben dy selben scheden all, wy di genant werden vnd dy wissentleich werden, dy lub ich in all gentzleich abzetragen vnd widderzecheren an all ir mve vnd fodrung vnd dy sullen sy haben, daz mir vnd unuerschaidenleich auf aller meyner hab, dy ich vberal yndert hab oder noch gewynn, wy dy genant ist oder wirt, nichtz ausgenommen, vnd do von bekomen an furpoet ladung des hochwirdigen meins gnedigen herren des bischolfs ze Passaw, seiner techant oder ander seiner anwalt vnd all chlag geistleicher oder weltleicher herren, vnd sulln vnd mugen sew sich der vnderwinden, wo dy funden oder begriffen wirt als lang vnd vil vnd sew aller zerung vnd scheden do von vellichleich bechomen sein, ich sey lebentig oder tod, das ist also genzleich mein will vnd mein wort. Des ze vrchund gib ich obgenant Niclas Meyenwald pharrer zu sand Georgen den obgenanten meinen liben herren . . dem probst . . dem techant vnd dem gantzen capitel vnd auch dem gotzhaws ze Ardakcher den offen brif besigelten mit meynen anhangunden insigl. Des ist auch zeug der erber Hanns der Venk mit seine anhangunden insigl durch meiner fleyzigen pet willen im vnd seinen erben allen an schaden. Der geben ist nach Christi gepurt virtzehenhundert iar dar nach in dem funfzehnten iar an sand Achaty tag.

Source Fulltext: FRIESS, Ardagger (AÖG 46, 1871) S. 533-534