Wir Friedreich von gots gnaden römischer kunig zu allen tzeiten merer des reichs, hertzog ze Oesterreich, ze Steir, ze Kernden vnd ze Krain, graue ze Tirol etc. bekennen als die ersamen geistlichen vnser lieben andechtigen Kristof prior vnd der conuent vnserr lieben frawn zu Graemnikch Karthuser ordens sechs kchaes jerlichs diensts, so in die erbern , geistleichen vnd lieben andaechtigen . . n . . der brobst vnd das capitel sannd Margrethen gotzhaus zu Ardakcher jaerlich in vnser mauthaus ze Stain gedient vnd geraicht habent vnd dartzu newn vnd dreissig phund phenning beraits gelts den erbern, geistlichen vnsern lieben andaechtigen Hainreichen Hekel, brobst vnd dem capitel des yetz genanten gotzhaus zu Ardakcher vmb aindlef schilling phenning gelts in dem dorff ze Predell auf behausten guetern in Gröstnaer pharr gelegen in wechselweis gegeben haben nach innhalt der brief von in darumb ausgegangen, daz wir als lanndesfürst in Oesterreich vnd vormund vnsers lieben vettern kunig Lasslawen vnd obristen vogt der obgemelten gotzheuser zu demselben wechsel vnsern willen vnd gunst gegeben vnd bestaett haben vnd bestaetten auch wissentlich mit dem brief, was wir zu recht daran bestaetten sullen oder mugen, also daz derselb prior, conuent vnd ir nachkomen desselben gotzhaus ze Gemnikch dieselben aindlef schilling phenning gelts mit irer zugehorung für die obgemelten chaes vnd newn vnd dreyssig phund phenning nu furbazer innhaben, nutzen vnd niessen vnd allen irn frummen damit schaffen sullen vnd mugen, als mit ändern irn vnd irs gotzhaus aigen guetern als solhes auswechsels vnd lands recht ist vngeuerlich. Mit vrkund des briefs geben ze Wien an mittichen vor des heiligen kreutz exultationis nach Christi gepurde virtzehen hundert vnd im acht vnd virtzigisten iar, vnsers reichs im newndten iare.

Source Fulltext: FRIESS, Ardagger (AÖG 46, 1871) S. 539-540