Leonardus, dei gratia episcopus Pataviensis, universis et singulis, ad quos praesentes pervenire contigerit, salutem in domino. Ad ea libenter nostrum convertimus cogitatum, quae comoditatem ecclesiarum praecipue nobis subjectarum quolibet modo respicere dinoscuntur. Cum itaque certis et rationabilibus ex causis coram nobis plenius productis inter honorabiles in Christo dilectos Kristofforum, priorem monasterii beatae Mariae virginis in Gemnico ordine Karthusiensi ex una, et Hainricum Flekhel praepositum, Thoman Strabhower decanum totumque capitulum ecclesiae collegiatae sanctae Margaretae in Ardako nostrae dioecesis partibus ex altera, quoddam cambium undecim solidorum denariorum annui census super certis colonis eiusdem ecclesiae sanctae Margarethae pro redemptione sex caseorum, quos praefatum collegium memorato monasterio Gemnicensi annuatim solvere tenebatur, et triginta novem libris supradictae ecclesiae sanctae Margarethae persolutis, factum et initum dinoscitur iuxta literarum desuper confectarum coram nobis praedictam continentiam atque tenorem; nos itaque ad partium praefatarum supplicem instanciam nobis humiliter pro confirmatione contractus praefati supplicantium iam dictum contractum iuxta literarum desuper emanatarum seriem in singulis punctis et articulis ratificavimus, confirmamus ac praesentis scripti patrocinio ex certa scientia et auctoritate nostra ordinaria gratificamur, et confirmamus, volentes eundem nullo subsistente impedimento ab omnibus inuiolabiliter obseruari. Harum testimonio literarum sigilli nostri appensione roboratum. Datum in Castro nostro Ebelsperg decima die mensis Julii anno domini millesimo, quadringentesimo quadragesimo octavo.

Source Fulltext: FRIESS, Ardagger (AÖG 46, 1871) S. 538-539