Ich Hainrich der Fleischess von dem Stain vergich offenwar vnd tu^on chundt allen den die den brief sehennd oder ho^erent lesen, das ich mit wol bedachtem mu^ot vnd mit guetlichem willen aller meiner erben wie die genannt sind versatzt han meins freyen aigens ain hueb haist auf dem Pühl gelegen in Gallennchircher pharr, die mir worden ist zu meiner hausfrawen Cecili der Khremsdorfferin, den herren vnd dem gotshaws zu Pawgartennperg vmb funfczig phund wiener phenning der wir gantz vnd gar gewert sein ich vnd mein erben zu rechten tegen an allen schaden. Es ist auch desselben satzs jerlich lo^esung an sand Margretentag. Ich bin auch vnd mit mir all mein erben desselben satzs der egenanten herren vnd des gotshawss gwer fu^er alle ansprach, wo des durft geschiecht als satzs recht vnd lanndsrecht ist in O^esterreich. Gieng aber in den herren vnd dem gotshaws daran icht ab mit recht, wes sy des schaden nement, das sullen sy haben auf aller der hab vnd setzen auch in die ze ebenteur die wir haben in dem land ze O^esterreich wir sein lebentig oder tod. Das die red sta^et vnd vnuerchert vnnd ganntz beleib, gib ich in den brief versigelten mit meinem anhangunden jnnsigel vnd mit meins brueder jnnsigel Hartmuets des Fleischessen von dem Stain. Der brief ist geben nach Crists purd dreuzehen hundert jar darnach in dem su^eben und funfftzigisten jar.

Source Fulltext: OÖUB 7 (Wien 1876) S. 544f., Nr. 533