Ich Hainreich der Smeltz vnd jch Diemu^ot sein hawsfraw jch Herwort der Smeltz vnd jch Elspet sein hausfraw vnd mit vns all vnnser erben wir verjehn vnnd tu^on kund offennlich, das wir den erwirdigen geistlichen herren abbt Jannsen vnd dem conuent gemain ze Pawngartennperg recht vnd redlich zu kauffen haben geben vnnsers freyen aigen vnd vnuerchumerten gutz vnnser lehngut zu Aschparn, gelegen jn Riederpfarr vmb fünfftzehn phund wiener phenning, der sy vns gantz vnd gar verricht vnd gewert habent zu rechtenn ta^egenn an allen schaden. Was in daran abgeet mit recht, wietann schadn sy des nement, den sullen sy mit sampt dem haubtguet vnuerschaidennlich haben auf vns vnd auf aller der hab die wir haben, vnd dauon bechommen mit vnser herrn gwallt der holden wir zu den zeitenn sein, vnd auch mit des gerichts gwalt darjnn sy vns oder vnnser hab begreiffent, an fu^erpot an clag vnd an alles recht. Wir offenn auch, das den vor genannten herren vnd dem gotshaws das egenannt lehn zu Aschparn gebn vnd gechaufft ist von dem erbern mann Thoman dem Schwanter burger zu der Freinstat, vnd hat das geben zu sand Maria Magdalen altar zu einem ewigen liecht, das tag vnd nacht prynn jm vnd seinen voruodern zu einem ewigen seelgera^et. Das die red sta^et vnd vnuerchert ewiclich beleib, des geben wir jn zu einem ewigen vrchund den offenn brief versigelten mit des edln erbern herren hern Jannsen von Trawn zu den zeitn haubtman in der Riedmarch anhangunden innsigl vnd auch mit hern Ottn des O^eder anhangunden innsigl; darzu auch mit der erbern burger Hainreichs des Vollenn, zu den zeitn richter der stat zu Enns vnd Petreins des Hersinger, die zeit des rats daselbs, die auch der sach gezewg sind mit jrn anhangunden insigln, jn an schadn wan wir selber aigen insigeln nicht gehabt habn. der brief ist gebn M. ccc jar vnd darnach in dem Ix/ten an sand Philips vnd sand Jacobstag.

Source Fulltext: OÖUB 7 (Wien 1876) S. 697f., Nr. 692