Wir^a) der rate gemainlich der stat ze Costentz tůnt kvnt mit disem gegenwúrtigen brief allen, die in ansehent alder ho^erent lesen, daz fúr v´ns komen ist || an disem húttigen tag, als dirre brief geben ist, vnser lieber burger Eberhart von Ramswag vnd offenet vor v´ns, als er vnd och sin brůder Hainrich Walther¹ vnd och ire || vettern V^olrich vnd Burkart von Ramswag² gebrůder vormals ir sto^esse, die si hattent gen den edelen herren grauen Hûgen, graf Albrehten, graf Hainrichen vnd graf || Albrehten gebrudern von Werdenberg³, komen vnd gegangen wa^erint ze der minne vff vnsern burgermaister Cv^onrat Hagen⁴, Cv^onrat Mangolt vogt⁵, Jacob den Hůber den alten burgermaister⁶, V^olrichen den Habk vnser statamman⁷ vnd vff Johansen Swertfúrbel, den man nemmet der Glatz, die selben ffv´nf hettint si och baidenthalb gen anander vnd mit anander darvmb verrihtet vnd v´berain braht in der wise, als dirre nachgeschriben brief geschriben stu^end vnd daz vo^elleclicher wiseti, vnd wa^er och in dem selben irem sprûch vnd ta^edingen beredd, daz jetwedere tail dem andern des selben spruches ain besigelten brief geben solt. Dez spertint sich aber die selben herren von Werdenberg vnd woltent inen den brief nit besigelen, wie doch daz wa^er, daz die selben von Ramswag iren brief besigelt hettint. Vnd darvmb bat v´ns der selb Eberhart von Ramswag, daz wir den selben spruchbrief verho^eren woltin vnd im des ain vidimus vnder vnser stette insigel geben woltint besigelt. Do verhorten wir vnd och die obgenanten fv´nf den selben vssprûch brief. Darnach fragotten wir do die selben ffv´nf, vff die si ir sach gesetzet hattent, ob der brief stu^end in der wise, als si darvmb vsgesprochen hettint. Do sprachentz alle vff ir aide, daz der selb brief gelich stu^ende, als si och darvmb gesprochen hettint, vnd stat och der selb brief also: ||
Es folgt der Text von Nr. 5699.||
Vnd wôn wir der rate ze Costentz disen obgenanten vssprûchbrief haben gesehen vnd och geho^eret haben lesen vnd och die verho^ert haben, die den vssprûch getân hant, als vor ist beschaiden, so haben wir vnser stett insigel gehenkt an disen brief. Der ist ze Costentz geben, do man von Cristes gebúrt zalte drvzehenhvndert jar, darnach in dem ain vnd ahtzigosten jar, an sant Jacobs abend dez hailigen zwelfbotten.

Source Fulltext: Chartularium Sangallense IX, Nr. 5859, S. 520-521.