Wir^a) des hailigen Ro^emschen richs stett, die den bund sament haltent vmb den Se¹, tůnt kvnd mit disem gegenwirtigen || brief allen den, die in ansehent oder ho^erent lesen, daz wir vff hútt disen tag, als dirre brief geben ist, ze Costentz bi an ander || gewesen sigint von manvng wegen v´nser lieben aidgenossen dero von Lindow² von der klag vnd ansprach wegen, so iro burger || der hohwirdig fúrst v´nserr gna^ediger herre herr Cv^on von gottes gnaden abt des gotzhus ze sant Gallen³ von sin vnd sins gotzhus rehten wegen hatte gen v´nserrn lieben aidgenossen den burgern der stat ze sant Gallen, daz darumb der selb abt vnd v´nser aidgenossen von sant Gallen erberú botschaft fúr v´ns kament. Vnd sprach vnd erzalt der selb v´nser herre der abt vil stuk vnd rechtvng, die er vnd sin gotzhus ze sant Gallen hettent, dv´ wo^eltent aber die von sant Gallen im nit tůn noch vollefu^eren, nach dem als im die stett vmb den Se vormals gesprochen hettint, des selben vsspruchs er ainen gůten brief mit der von Costentz insigel besigolt hett, daz verantwurtent aber die von sant Gallen mit briefen vnd mit worten, so si beschaidenlichost mochtent. Darumb verhortent wir do baider tail brief, der si vil fúr v´ns brahtent, vnd nach allen briefen vnd nach vil redd vnd widerredd, die wir von ietwederm tail verhortent und in nament, so haben wir die stett vmb den Se darumb gesprochen vnd v´ns ainberlich erkent, daz v´nser aidgenossen von sant Gallen beliben sont bi dem brief, den der obgenant v´nser herre abt Cv^on mit sinem insigel besigolt ha^vt, des geliehen si och von abt Georyen sa^eligen⁴ vnd von andern a^ebten besigolt brief hant, vnd och also, won der obgenant vsspruch brief, den die stett vmb den Se dem selben v´nserm herren abt Cv^on vnder der von Costentz insigel besigolt geben hant, wiset vnd sait, daz si im húlden sweren vnd tůn sont, als si andern sinen vorvarenden getân hant. Darumb so haben wir och gesprochen, was der selb v´nser herre abt Cv^on wiset ander sachen, die in dem obgenanten brief, den er besigolt ha^vt, nit begriffen sint, daz sins gotzhus reht sie vnd daz si andern sinen vordem getân hant, wist er daz, als die stett vmb den Se sich erkennent, daz sont si im och tůn. Vnd des alles ze warem vnd offenn vrkv´nd aller dirre vorgeschriben ding so hant die von Costentz von v´nser aller haissens wegen ir stett insigel gehenkt an disen brief. Der ist ze Costentz geben, do man von Cristes gebúrt zalt drúzehenhundert jar, darnach in dem ain vnd ahtzigosten jar, an der na^ehsten mitwuchen vor sant Margarethen tag.

Source Fulltext: Chartularium Sangallense IX, Nr. 5858, S. 519-520.