Allen^a) den, die disen brief ansehent lesent oder ho^erent lesen, kúnde ich Jacob Giger von Lindow¹ der blaicher vnd vergich offenlich an disem brief, als mich die || ffromen lút der burgermaister der rât vnd besorger der stat ze sant Gallen gehaimot vnd geuangen hattent vmb etwas fra^eueli vnd tro^ewlich rêde, als ich || wider etlich ir burger getân hatt, vnd won si mich durch min vnd miner frúnde bett vss vanknust lêdig gelâssen hant, darvmb so han ich frilich willeklich vngebun||den vnd vngeuangen offenlich gesworn ainen ait zů den hailgen mit gelêrten worten vnd mit v^fgehabnen vingern, der vorgedahten des burgermaisters des râtes der besorger der burgerr gemainlich ze sant Gallen vnd ir ieklichs besunder vnd mit namen aller dero, die an der selben miner vanknust schuld gehept hant oder des râtent ald helffent gewesen sint in dehain wîse, luter gantz vnd gůt frúnd ze sinne vnd alle min frúnd inen darvmb ze frúnd ze gewinnenn vnuerzogenlich ane alle geua^erde, vnd wa^er, das ich dehainen miner frúnd der frúntschaft niht v´berkomen noch gewîsen mo^eht, das ich das inen verkúnden sol vnd wil als fúrderlich als zitlich vnd als erberlich, das kain schad da von v^fstande noch v^fstan muge. Ich han o^vch in den selben ait genomen vnd gesworn, das ich noch ieman von minen wegen dis vorgedahten vanknust vnd getât gegen den burgern von sant Gallen gemainlich noch gegen ir dehainem besunder noch gegen jemann, der daran schuld gehept hât, es sie mit worten ra^eten ald geta^eten, niemer andan noch a^eferren sol noch wil weder mit gaistlichem noch mit weltlichem geriht noch ân reht noch in kain wîs suss noch so luterlich âne alle geua^erde. Vnd darvmb das si des dester sicherer sien, so han ich in^b) darzů ze mêrer sicherhait ze rehten búrgen vnd wern geben vnd gesetzt dis nâchgenemten min frúnd Laurentzen Arnolt, Hugen vnd Johansen die Růpreht gebrůder, Nyclausen Růpreht, V^olrich den Schedler, Johansen sinen sun, Hainricen Warman, Johansen von Wîda², Walthern Schúrpfen, Johansen Maiger den gewantschnider, Hainricen Marner, Berschin Kurer, alle burger ze sant Gallen, Hainin Hugs von Wolffratswille³ vnd Hugen sinen brůder, Johansen Ehinger miner swester sun vnd Cůnrat den Hafner, den man nemmt La^ehli, die hant alle sament gemainlich die búrgschaft vnd werschaft vff sich genomen vnd gelopt ir ieklicher mit siner trúwe vnd hant sich mit namen verbunden also mit der beschaidenhait vnd gedinge, wa^er, da vor got sie, das ich min êr vnd minen ait v´bersa^eh vnd die vorgeschriben vanknust ich oder ieman von minen wegen gegen den selben burgern von sant Gallen gemainlich oder dehainem besunder oder gegen iemann iemer andati oder a^eferti mit geriht oder ân reht mit worten ald mit werken oder in dehain wîs vnd sich das erfunde, so sont die vorgenemten búrgen vnd wern den selben burgern vnd der stat ze sant Gallen hundert mark lo^etiges silbers Costentzer gewiht gantzlich veruallen vnd in die gebunden sin ze werenn vnd ze rihtenn gar vnd gantzlich darnach inrunt dem na^ehsten mânot âne allen fúrzug vnd Widerrede, ald ta^etint si des niht, so sont vnd mugent die selben der burgermaister der rât oder besorger ze sant Gallen vnd ir erben vnd nâchkomen die selben búrgen vnd wern pfenden no^eten hêften vnd angriffen an lúten vnd gůten in stetten in do^erffern vnd vff dem lande mit gaistlichem vnd mit weltlichem geriht vnd âne alles reht ân klag vnd ân allen zorn, wie vnd wâ sú das getůn mugent, als vil vnd als verre, vntz das sú der vorgeschribnen hundert mark silbers vnd des schaden, in den si von des selben pfendens heftens vnd angriffens wegen koment, gantzlich gewert vnd v^ssgeriht werdent âne allen ir schaden. Vnd sol die selben búrgen vnd wern noch ir lút noch ir gůt da vor niht schirmen enkain ffrihait noch gewonhait enkain buntnust stetreht noch burgreht weder gaistlich noch weltlich geriht noch enkain ander reht sach noch fúrzug. Es wa^er denn, das si nâch dem, so si des vorgedâhten silbers veruallent, als vor ist beschaiden, mich danne lebenten antwúrtint ainem burgermaister vnd dem rat oder besorgern ze sant Gallen, ob da niht râtes wa^er, in irú band, das sú min sicher sint, so sont si der vorgeschribnen búrgschaft vnd gelúpt danne gantzlich lêdig sin vnd los. Ich han o^vch in den ait genomen, das ich schaffen sol, das Ja^ecli min sun inrunt dem na^ehsten manot nâch dem tag, als dirr brief ist geben, o^vch vnuerzogenlich kome gen sant Gallen fúr den rât vnd besorger, vnd das er dann den selben ait da swêre, als o^vch ich gesworn han vnd als vorgeschriben stât. O^vch han ich in den selben ait genomen vnd gesworn, was ich mit den selben burgern von sant Gallen gemainlich oder mit ir dehainem besunder ze schikenn oder ze schaffenn hêtt oder gewunne, das ich noch nieman von minen wegen si darvmb nienert v^ftriben noch bekúmberren sol noch wil, won das ich das reht darvmb allweg zůtz in vordren vnd nemen sol ze sant Gallen vor irem geriht, âne alle geua^erde. Vnd des alles, so hie vorgeschriben stât, ze offemm waren vrkúnde vnd ze ainer sta^eter sicherhait aller vorgeschribner dinge vnd gedinge so han ich der obgenant Jacob Giger min insigel offenlich gehenkt an disen brief, vnd wir die vorbenemten búrgen vnd wem Laurentz Arnolt, Hug vnd Johans Růpreht gebrůder, Nyclaus Růpreht, V^olrich Schedler, Johans sin sun, Hainrice Warman, Johans von Wîda, Walther Schúrpf, Johans Maiger der gewantschnider, Hainrice Marner, Berschi Kurer, Haini Hugs von Wolffratswille vnd Hug sin brůder, Johans Ehinger vnd Cůnrat Hafner, den man nemmt La^ehli, veriehen alle offenlich ain gantz wârhait aller der dinge vnd gedinge, so von v´ns da vorgeschriben stât an disem brief. Vnd des ze mêrer sicherhait so haben wir die selben Laurentz Arnolt, Hug vnd Johans die Růpreht gebrůder, Nyclaus Růpreht, V^olrich Schedler, Johans von Wîda, Walther Schúrpf, Johans Maiger vnd Hainrice Marner v´nsrú insigel o^vch offenlich gehenkt an disen brief, vnd won ich der obgenant Johans Schedler aigens insigels niht hatt, so han ich mich verbunden willeklich vnder des obgenanten V^olrich Schedlers mines vatters insigel, vnd ich der obgenant Hainrice Warman, won ich o^vch aigens insigels niht hatt, so han ich erbetten Georien Warman minen brůder, das er o^vch sin insigel fúr mich gehenkt hat an disen brief. Vnd won wir die vorbenemten Berschi Kurer, Haini Hugs von Wolffratswille vnd Hug sin brůder vnd Johans Êhinger o^vch aigner insigel niht hattent, so haben wir erbetten die erbern wolbeschaiden Othmarn Wildrich, Hermann Egger vnd Laurentzen Schnider o^vch burger ze sant Gallen, das sú o^vch irú insigel fúr v´ns gehenkt hant an disen brief, vnder dú selben insigel wir v´ns willeklich gebunden haben aller vorgeschribnen dinge vnd gedinge, vnd ich der obgenant Cůnrat Hafner, won ich o^vch aigens insigels niht hatt, so han ich erbetten Kasparn Vo^elin o^vch burger ze sant Gallen, das er o^vch sin insigel fúr mich gehenkt hât an disen brief. Ich der obgenant Geori Warman vergich, das ich min insigel fúr den obgenanten Hainricen minen brůder vnd durch sin bett gehenkt han an disen brief, vnd wir die obgenanten Othmar Wildrich, Herman Egger vnd Laurentz Schnider veriehen offenlich, das wir durch bette der obgenanten Berschi Kurers, Haini Hugs vnd Hugen sines brůders vnd Johans Ehingers v´nsrú insigel fúr sú gehenkt haben an disen brief v´ns vnd v´nsern erben vnscha^edlich. Vnd ich der obgenant Kaspar Vo^eli vergich o^vch, das ich min insigel fúr den obgenanten Cůnrat Hafner vnd durch sin bett gehenkt han an disen brief mir vnd minen erben o^vch vnscha^edlich. Dirre brief ist geben ze sant Gallen an dem na^ehsten ffritag nach sant Jacobs tag des zwelffbotten in dem iâr, do von Cristus gebúrt wârent drúzehenhundert jâr vnd darnach in dem ain vnd ahtzigosten jâre.

Source Fulltext: Chartularium Sangallense IX, Nr. 5860, S. 521-524.