Allen^a) den, die disen brief ansehent lesent oder ho^erent lesen, kúnd ich Johans amman ze Roschach¹ vnd vergich of||fenlich mit disem brieue, daz fúr mich kam ze Roschach an dem na^ehsten samstag vor sant Mathyas tag dez hai||ligen zwelfbotten, do ich an dez richs strasse offenlich ze geriht saz, der beschaiden kneht V^olrice der Keller || von Tal² vnd offenot mit fúrsprechen offenlich vor mir an gemainem geriht vnd sprach, er wo^elt mit wolbedahtem můt vnd gůter vorbetrahtung dem ersamen sinem gna^edigen herren Herman von Sultzberg³ dem eltern, dez aigen er wa^er von dem libe, willeklich vnd frilich reht vnd redlich vf geben vnd zv^o sinen handen vertgen den wingarten gelegen an dem Bůchberg⁴, der ainhalb stosset an Cristan Vo^elis burgers ze sant Gallen wingarten vnd anderthalb an Elzbethen Kriesserinen sa^elgen wingarten, mit grunt mit grât mit allen rehten nútzzen vnd gewonhaiten vnd mit aller zv^o geho^erde, der sin reht aigen wa^er, vnd bat mich eruarn an ainer vrtail, wie er daz tůn so^elt vnd mo^eht, alz reht wa^er vnd daz ez kraft hett vnd haben mo^eht nv vnd o^vch hie nach. Do fragot ich vorbenemter amman vrtail vmb vnd ward ertailt mit gemainer vrtail, daz er dem vorgenanten Herman von Sultzberg sinem herren den vorgeschribenen wingarten mit allen rehten vnd mit aller zv^o geho^erde offenlich an dez riches strasse mit siner hant willeklich vnd frilich vf geben vnd zv^o sinen handen vertgen so^elt vnd daz ez danne also wol kraft vnd maht hetti nach dem rehten. Vnd gab o^vch do ze stette der vorgenant V^olrice Keller von Tal mit gůter vorbetrahtung willeklich vnd frilich reht vnd redlich offenlich an dez riches strasse den vorgeschribenen wingarten gelegen an dem Bůchberg mit allen rehten vnd mit aller zv^o geho^erde mit siner hant vf zv^o dez vorgenanten Hermans von Sultzberg sines herren handen, alz reht waz vnd alz o^vch mit gemainer vrtail ertailt ward. Vnd verzech sich o^vch do der vorgenant V^olrice Keller offenlich vor mir an gemainem geriht willeklich frilich vnd vnbezwungenlich vnd verziht sich mit vrkúnd diz brieues gantzlich vnd gar fúr sich vnd fúr alle sin erben dez vorgeschribenen wingarten mit aller zv^o geho^erde aller aigenschaft aller kuntschaft aller gewer lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so er oder sin erben an dem zv^o dem vnd von dez vorgeschribenen wingarten wegen vnd waz darzů geho^ert ie gehept hat ald hie nach iemer gehaben oder gewinnen mo^ehtint, vnd daz er noch enkain sin erben noch nieman andre an iro stat noch von iro wegen den vorgenanten sinen herren Herman von Sultzberg noch dehain sin erben noch nachkomen von dez vorgeschribenen wingarten wegen vnd waz darzů geho^ert niemer súllent noch wellent ansprechen vf triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd notdurftig wârent vnd alz ez kraft vnd maht sol vnd mag han. Vnd ze vrkúnd der warhait aller der vorgeschribenen dinge vnd vergiht so han ich Johans amman ze Roschach da vorgenemt von dez gerihtes wegen min insigel gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Diz beschach vnd ward dirre brief geben ze Roschach an dem vorgeschribenen samstag in dem jar, do man zalt von Cristus gebúrt drúzehenhundert jar, ahtzig jar vnd darnach in dem fúnften jare.

Source Fulltext: Chartularium Sangallense X, Nr. 6056, S. 228-229.