Ich^a) Jacob Růpreht, den man nemmt der Lo^ew, statamman ze sant Gallen¹ tůn kunt vnd vergich offenlich an disem brieff allen den, die in sehent lesent oder ho^erent lesen, das fúr mich kamen || ze sant Gallen in der stat an sant Thomas abent des hailgen zwelffbotten, do ich vff des riches offner strâsse offenlich ze geriht sass, Johans Ko^echler von sant Gallen der iunger || an ainem tail vnd der burgermaister vnd der rât gemainlich der stat ze sant Gallen an dem andern tail, vnd offnote vnd veriah da der selb Johans Ko^echler offenlich vor mir in || dem gerihte mit sinem fúrsprechen von der vanknust wegen, als în die vorgedahten fromen wîsen der burgermaister vnd der rât gemainlich ze sant Gallen gehaimot vnd in ir banden vnd vanknust hattent vmb das, das er sin gúlta, die man im schuldig was, niht wolt helffen in samnon vnd kêren an die schulda, die er selber schuldig was, vnd da er vil erber burger ze sant Gallen versetzt vnd verkúmbert hatt, als er des gesworn hatt ze tu^ende, vnd o^vch vmb das, das er darúber den ra^eten ze sant Gallen vnreht vnd ba^erlich vnd tro^ewlich zů rêtte offenlich vnd haimlich, vnd won aber in die selben der burgermaister vnd die ra^et ze sant Gallen durch siner frúnd bett willen vsser der selben vanknust ledig gelâssen hêttint, so wo^elti er sich diser nâchgeschribnen sach willeklich vnd gern verbinden, als hienach beschaiden ist an disem brief. Des êrsten do swůr der selb Johans Ko^echler offenlich vor mir in dem gerihte frilich vnd willeklich vngebunden vnd vngeuangen gesunt libes vnd můtes mit gůter vorbetrahtunge ainen gelêrten ait zů den hailgen mit v^fgehabnen vingern, vmb die vorgedâhten vanknust der vorgedâhten des burgermaisters des râtes vnd aller burger gemainlich von sant Gallen vnd iro ieklichs besunder vnd mit namen aller ma^englichs, wer an der selben siner vanknust dehain schuld in dehain wîse gehêpt hât, darzů gehaft ist, lûter gantz vnd gůt frúnde ze sinne vnd alle sin frúnd inen darvmb ze frúnd ze gewinnen ân fúrzug vnd die selben vanknust vnd getât niemer ze andenn noch ze a^eferrenn in kain wîse ân alle geua^erde. Er nam o^vch in den selben ait vnd swůr, das er die vorgedâhten sin gúlta wolti ân fúrzug helffen in samnon vnd zů der drier erber manne handen, die darzů benemmt sint, erberlich vnd vngeuârlich bringen, darvmb das die selben sin gúlta komint vnd bekert werdint an die schulda, die er selber schuldig ist, vnd darumb er vil erber burger ze sant Gallen versetzt hât, vnd das er niemer des abswaiff noch flúhtig werden wo^elt noch so^elt. Er nam o^vch in den ait alles sin gůt benemptz vnd vnbenemptz, wâ das wa^er ald wie es geschaffen wa^er, den selben drien erberen mannen ze zaigenn vnd ze antwúrtenn vngeuârlich, das es an die selben sin schulda kome, als vor ist beschaiden. Wa^er aber, das er ald ieman von sinen wegen darúber die vorgedâhten vanknust gegen den vorgedâhten dem burgermaister den ra^eten oder gegen den burgern vnd der stat ze sant Gallen gemainlich oder gegen dehainem burger ald burgerinen ze sant Gallen besunder oder gegen iemann andre iemer a^eferti oder andatti mit geriht ald ân reht mit worten oder mit werken ald in dehain wîse haimlich oder offenlich, wenne oder wâ das bescha^eh, das danne die selben der burgermaister der rat vnd die burger gemainlich von sant Gallen ald iro iekliche besunder ald wer in des helffen wil, den selben Johansen Ko^echler haimen vnd vâhen sont vnd mugent ân alles reht vff dem lande ald in stetten oder wâ si in ergriffen mugent, vnd das si den selben Johansen Ko^echler denne fúr ainen scha^edlichen verschulten vnd vertailten man verdêrben vnd von dem libe tůn sont vnd mugent ân alles reht vnd âne vrtail. Des hat er sich mit namen offenlich vor mir in dem geriht frilich vnd willeklich mit bedâhtem můt vngebunden vnd vngeuangen gesunt libs vnd můtes gebunden vnd das in davor niht schirmen sol enkain frihait noch gewonhait enkain reht weder gaistlichs noch weltlichs gerihtes enkain gesetzt noch buntnust der herren noch der stette enkain burgreht noch lantreht noch stettreht noch enkainerlay ander sach noch schirme, won er sich mit namen verzigen hât aller helffe aller gnaden alles v^szugs alles schirmes vnd alles des, damit er sich wider die vorgeschriben sach vnd buntnust iemer gesetzen ald dawider gereden ald gewerben kundi oder mohti in dehain wîse. Darnach batent mich die vorgedahten der burgermaister vnd der rât ze sant Gallen mit irem fúrsprechen ervaren an ainer vrtail, ob man in vnd der stat ze sant Gallen hierúber iht billich des gerihtes brief geben so^elt. Do frâgte ich vorbenemter amman vrtail vmb vnd wart ertailt mit gemainer vrtail, das man in hierüber billich des gerihtes brief geben so^elt. Vnd des alles ze offemm wâren vrkúnde so han ich Jacob Růpreht statamman da vorgenemt min insigel nâch rehter vrtail offenlich gehenkt an disen brief. Ich der obgenant Johans Ko^echler der iunger vergich offenlich an disem brieff ain gantz wârhait aller der dinge vnd búnde, so von mir da vorgeschriben stat an disem brieue, vnd des ze merer sicherhait so han ich o^vch min insigel offenlich gehenkt an disen brieff. Vnd darúber ze merer sicherhait so han ich erbetten den beschaidenn Johansen Go^essler vogt ze sant Gallen², das er sin insigel zů des obgenanten statammans vnd zů minem insigel gehenkt hât o^vch an disen brief, won er o^vch hiebi bi dem obgenanten statamman an disem geriht ze gegen gesessen ist. Ich der selb Johans Go^essler vogt, als vorgeschriben stât, vergich, das ich durch bett des obgenanten Johansen Ko^echlers min insigel o^vch gehenkt han an disen brieff. Dis beschach vnd wart dirr brief geben ze sant Gallen an dem vorgeschriben sant Thomas abent des hailgen zwelfbotten in dem iare, do von Cristus gebúrt wârent drúzehenhundert jar vnd darnach in dem vier vnd ahtzigosten jâre.

Source Fulltext: Chartularium Sangallense X, Nr. 6048, S. 218-220.