Allen^a) den, die disen brief ansehent lesent oder ho^erent lesen, kúnd ich Herman ab Husen¹ burger ze sant Gallen amman ze || Bernang² in dem Rintal vnd vergich offenlich mit disem brieue, daz fúr mich kam ze sant Gallen der beschaiden kneht Jo||hans von Gerswendi³ burger ze Costentz vnd veriach offenlich vor mir fúr sich, fúr Hainrichen vnd fúr Angnesen, V^olrichs || sa^elgen ab Kellerberg⁴ sines brůders êlichú kint, der rehter vogt er wa^er, vnd fúr alle iro erben, daz er von der selben kind redlichen nôt wegen disú nâchgeschribenen gu^eter, den wingarten, den man nemmet der Hu^enlisbach⁵, gelegen an dem Kobel⁶ bi Bernang in dem Rintal, der ainhalb stôsset an Hainrich Tegans wingarten, mit hûs mit hof mit stadel mit torggel mit akkern mit bo^vmen mit wasen mit zwi mit holtz mit veld vnd mit aller zv^o geho^erde, vnd den wingarten darob gelegen, den man nemmet der Grass, mit grunt mit grât mit allen rehten nútzzen vnd gewonhaiten vnd mit allem dem, so von reht ald von gewonhait darzv^o vnd darin geho^ert, ez sie genemptz oder vngenemptz, gesůchtz oder vngesůchtz, wissentz oder vnwissentz, die der selben kind lehen wa^erint von dem êrwirdigen gotzhus ze sant Gallen, redlich vnd reht an der vorgenanten kind stat vnd von iro wegen verko^vft vnd ze ko^vffenn geben hett Hainricen Garnleder dem schriber burger ze sant Gallen vnd sinen erben, ob er enwa^er, vnd gab o^vch do der vorgenant Johans von Gerswendi an der vorgenemten kind stat vnd von iro wegen dú vorgeschribenen gu^eter, den wingarten, den man nemmet der Hu^enlisbach, mit hus mit hof mit stadel mit torggel mit akkern mit bo^vmen mit wasen mit zwi mit holtz mit veld vnd mit aller zv^o geho^erde, vnd den wingarten dar ob gelegen, den man nemmet der Grass, mit grunt mit grât mit allen rehten nútzzen vnd gewonhaiten vnd mit aller zv^o geho^erde willeklich v^f an min hant vnd bat mich sú lihen ze lehen dem vorgenanten Hainricen Garnleder. Do erhort ich sin ernstlichen bet vnd lêch die vorgeschribenen wingarten mit hus mit hof mit stadel mit torggel vnd mit aller zv^o geho^erde, alz vorgeschriben stât, vnd lich sú mit disem brieue reht vnd redlich ze lehen dem vorgenemten Hainricen Garnleder, vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzů gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so han ich Herman ab Husen da vorgenemt min insigel gehenkt an disen brief. Der geben ist ze sant Gallen an der na^ehsten mitwuchen vor sant Martis tag in dem jâr, do man zalt von gottes gebúrt drúzehenhundert jâr, sehszig jâr vnd dar nach in dem ahtoden jâre.

Source Fulltext: Chartularium Sangallense VIII, Nr. 5153, S. 322.