Ich^a) Albreht von Bussnang¹ friie lantrihter in Turgo^vwe tůn kunt mit disem brief allen den, die in sehent lesent oder ho^erent lesen, || das ich ze Hafnerren² an dem lantag der na^ehsten mittwochen vor sant Othmars tag, da ich offenlich ze gerichte sass, der êrbern lúte || des burgermaisters des râtes vnd der burgere gemainlich der statt ze sant Gallen offenlich brief vnd vrkúnde³ gesehen han be||sigelt mit des hocherbornen des Ro^emschen kayser Karlen ingesigel, das in der obgenante kayser Karle die gnade getan hât vnd inen dú frihait vnd rechtunge gegeben hât, sunderlich das er wil vnd gesetzet vnd beste^attiget hat mit sinen kayserlichen gnaden, ob das wa^ere, das ieman kain ansprach oder klag hette oder gewunne zů den selben sinen burgern, von welerlay sach das wa^ere, der sol si niendert anders weder fúr lantgerichte noch kain ander gerichte vswendig der statt noch fúr sin hofgerichte laden ansprechen noch beklagen danne vor irem richter in der statt ze sant Gallen, da man o^vch recht von in nemen sol, als danne daselbs geurtailet wirt, also das er ||
o^vch setzet vnd erkennet^b), swas anderswa vnd vor andren gerichten vff si ertailt oder erclegt wa^ere oder hernach erclegt oder ertailt wurde, das sol alles ze mâl kain krafft macht noch verstenunge haben noch gewinnen, es wa^ere danne, das iemann^b), der da klegti, das recht versait oder wider recht vnd gewonhait verzogen wurde, so mo^ehte der kleger si vff des kaysers hofgerichten vnd o^vch anderswa laden, da es billich ist, vnd da sin recht ersteen vnd eruolgen, vnd davon so gebútet o^vch der obgenante kayser Karle mit sinem kayserlichen gewalte aller mennelichem, das nieman die obgenanten den burgermaister den rât noch die burgere gemainlich der statt ze sant Gallen wider die vorgeschriben sin kayserlich gnade beste^attigung vnd confirmacion hindern noch schadgen so^elnt in thain wise, wer aber dawider ta^ette, der sol fúnfzig mark goldes rechter pen veruallen sin, vnd die selben súlnt halb siner kayserlicher kamer vnd das ander halbtail den, die das vnrecht lident, ganztlich geuallen. Vnd darumb won ich ir frihait also gesehen han, so hab ich in nach rechter vrtail, won in mit gesamnoter vrtail ertailt ist, das si der gnâde vnd rechtung geniessen súlnt, disen brief geben besigelt mit des lantgerichtes insigel in Turgo^vw. Der geben wart an dem vorgeschriben lantag nach gotts geburt drúzehenhundert vnd sechtzig jâr vnd darnach in dem ahtoden jâre.

Source Fulltext: Chartularium Sangallense VIII, Nr. 5155, S. 325.