Allen^a) den, die disen brief ansehent lesent oder ho^erent lesen, kúnd ich Herman ab Husen¹ burger ze sant Gallen amman ze Bernang² in dem Rin||tal vnd vergich offenlich mit disem brieue, daz fúr mich kam ze sant Gallen der beschaiden kneht Johans von Gerswendi³ burger ze Costentz || vnd veriach offenlich vor mir fúr sich vnd fúr Angnesen V^olrichs sa^elgen ab Kellerberg⁴ sines brůders êlichen tohter, der rehter vogt || er ist, vnd fúr alle iro erben, daz er von der selben Angnesen redlicher nôt wegen disú nachgeschribenen gu^eter, die wisun ennent der Ach⁵, die ainhalb stôsset an dez von Zwingenstain⁶ wis vnd an Andres Entzziswillers, die wisun vnd die zwô juchart akkers hie disent der Ach, die da stôssent an dez von A^emptz⁷ akker vnd an Hainrichs dez Tegans wis, die selben wisan vnd akker man nemmet dez Heldes wisen vnd akker vnd gelegen sint vnderthalb dem Kobel⁸ bi Bernang in dem Rintal, die der vorgenanten Angnesen lehen wa^erint von dem erwirdigen gotzhus ze sant Gallen, mit allen rehten nútzzen vnd gewonhaiten vnd mit aller zv^o geho^erde redlich vnd reht verko^vft vnd ze ko^vffenn geben hettint Hainricen Garnleder dem schriber burger ze sant Gallen vnd sinen erben, ob er enwa^er, vmb nún phunt phenning gůter vnd gena^emer Costentzzer múnse, der er gantzlich von im gewert wa^er vnd enphangen hett vnd an der obgenanten Angnesen siner můmen offenn nutz bewendet an den stetten, da er iren wahsenden schaden mit verkomen hett. Vnd gab o^vch do der obgenant Johans von Gerswendi an der vorgenanten Angnesen stat vnd von ir wegen die vorgeschribenen wisen vnd akker mit allen rehten nútzzen vnd gewonhaiten vnd mit aller zv^o geho^erde willeklich v^f an min hant gantzlich vnd gar vnd bat mich sú lihen ze lehen dem vorgenanten Hainricen Garnleder. Do erhort ich sin ernstlichen bet vnd lêch die vorgeschribenen wisen vnd akker die wisun ennent der Ach vnd die wisun vnd die zwo juchart akkers hie disent der Ach mit allen rehten nútzzen vnd gewonhaiten vnd mit aller zv^o geho^erde vnd lich sú mit disem brieve reht vnd redlich ze lêhen dem vorgenanten Hainricen Garnleder, vnd verzêch sich o^vch do der vorgenant Johans von Gerswendi offenlich vor mir vnd verziht sich mit disem brieue gantzlich vnd gar fúr sich fúr die obgenanten Angnesen sin můmen vnd fúr alle iro erben der vorgeschribenen wisen vnd akker mit aller zv^o geho^erde aller aigenschaft aller manschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so er vnd die vorgenant Angnesa sin můme vnd iro erben, ob sú enwa^erint, an den zv^o den vnd von der vorgeschribenen wisen vnd akker wegen ie gehattent ald hie nâch iemer gehaben oder gewinnen mo^ehtint, vnd daz er noch die vorgenant Angnesa sin můme noch iro erben, ob sú enwa^erint, noch nieman andre an iro stat noch von iro wegen den vorgenemten Hainricen Garnleder noch dehain sin erben noch nâchkomen von der vorgeschribenen wisen noch akker wegen niemer súllent noch wellent an sprechen v^f triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Der vorgenemt Johans von Gêrswendi lobt o^vch da mit siner trúwe vnd lobet mit disem brieue fúr sich vnd alle sin erben, der vorgeschribenen wisen vnd akker vnd dez ko^vffes reht wer ze sinne fúr die vorgenanten Angnesen vnd o^vch den vorgenanten Hainricen Garnleder vnd sin erben darumb ze versprechenn vnd ze versta^enne an allen stetten gen der obgenanten Angnesen vnd gen aller ma^englichem ân allen iren schaden, wenn wâ vnd wie dik sú darumb an gesprochen geschadgot oder v^fgetriben werdent, vnd wenn die vorgenant Angnesa zv^o ir tagen kumpt, daz dann der selb Johans von Gerswendi ir vetter vnd sin erben, ob er enwa^er, ân fúrzug vnd ân alle widerred fu^egen vnd schaffen sont, daz die selb Angnesa dem vorgenanten Hainricen Garnleder vnd sinen erben, ob er enwa^er, die vorgeschribenen wisen vnd akker mit allen rehten vnd mit aller zv^o geho^erde vertge vnd zv^o iren handen bring, alz dann reht ist vnd sú sin nôtdurftig sint. Ta^et er oder sin erben, ob er enwa^er, daz niht, so hât der obgenant Hainrice Garnleder vnd sin erben, ob er enwa^er, vnd ir helffer, wer die sint, friges vrlob vnd vollen gewalt, darnach wenn sú wellent den vorgenemten Johansen von Gêrswendi vnd sin erben, ob er enwa^er, ze phendenn ze no^etenn ze heftenn vnd an ze griffenn an ||
ligendem vnd an varendem gůte vff dem land vnd in den stetten mit gaistlichem vnd mit weltlichem geriht vnd ân geriht ân klag vnd ân zorn, wie vnd wâ sú daz getůn mugent, alz vil vnd alz dik, vntz daz in die selb vertgung von der obgenanten Angnesen gantzlich vollefu^ert vnd v^sgeriht wirt, vnd o^vch alz vil vnd alz lang, vntz in der schad, in den sú vnd iro helffer von dez selben phendenns no^etenns heftenns vnd angriffenns wegen koment, gantzlich abgelait vnd vergolten wirt, vnd sol in noch sin erben hie vor noch hie wider niht schirmen noch gůt sin weder gaistlichs noch weltlichs geriht noch enkainer lay ander sach noch fúrzug. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzv^o gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so han ich Herman ab Hûsen amman da vorgenemt min insigel gehenkt an disen brief. Darnâch vergich ich Johans von Gêrswendi da vorgenemt offenlich mit disem brieue ainer gantzzer wârhait aller der dinge vnd gedinge, so von mir an disem brief da vorgeschriben stât, vnd ze mêrer sicherhait der selben dinge so han ich o^vch fúr mich vnd alle min erben min insigel gehenkt an disen brief. Der geben ist ze sant Gallen an dem na^ehsten donstag nâch sant Markus tag dez ewangelisten in dem jâr, do man zalt von gottes gebúrt drúzehenhundert jâr, sehszig jâr vnd darnach in dem núnden jâre.

Source Fulltext: Chartularium Sangallense VIII, Nr. 5170, S. 337-338.