Allen^a) den, die disen brief ansehent lesent oder ho^erent lesen, kúnd ich Hainrice Garnleder der schri||ber burger ze sant Gallen vnd vergich dez offenlich mit disem brieue fúr mich fúr alle min erben vnd || nâchkomen, daz ich den ersamen gaistlichen fro^vwen der . . priorinen vnd dem conuent gemain||lich sant Katherinen closters gelegen ze sant Gallen¹ in der vorstat mit gůter vorbetrahtung willeklich gelobt han mit miner trúwe an aines rehten aides stat vnd bind mich vnd alle min erben darzv^o mit disem brieue, daz ich vnd min erben, ob ich enbin, der vorgeschribenen der . . priorinen vnd dez conuentes gemainlich dez vorgeschribenen closters vnd iro nâchkomen gůter vnd getrúwer trager sin súllent v´ber disú nâchgeschribenen gu^eter, v´ber den wingarten, den man nemmet der Hu^enlisbach, gelegen an dem Kobel bi Bernang in dem Rintal, der ainhalb stosset an Hainrich Tegans wingarten, mit hûs mit hof mit stadel mit torggel mit akkern mit bo^vmen mit wasen mit zwi mit holtz mit veld vnd mit aller zv^o geho^erde, v´ber den wingarten darob gelegen, den man nemmet der Grass, v´ber den wingarten, den man nemmet dez Heldes wingart, der ainhalb stôsset an dez von Zwingenstain wingarten vnd anderthalb an der von Swartzzach wingarten, mit dem akker, alz der zûn begriffen hât, v´ber die wisun ennent der Ach, die ainhalb stôsset an dez von Zwingenstain wis vnd an Andres Entzziswillers, v´ber die wisun vnd v´ber die zwô juchart akkers hie disent der Ach, die da stôssent an dez von A^emptz akker vnd an Hamrichs dez Tegans wis, mit grunt mit grât mit allen rehten nútzzen vnd gewonhaiten vnd mit aller zv^o geho^erde, also daz ich vnd min erben, ob ich enwa^er, die priorinen vnd den conuent gemainlich dez vorgeschribenen sant Katherinen closters vnd iro nâchkomen an den selben wingarten vnd gu^etern vnd an allem dem, so darzů vnd darin geho^ert, vnd an den nútzzen der selben wingarten vnd gu^eter niemer hinderren schadgen sûmen noch daran drengen súllent in dehainen weg noch mit dehainen sachen, waz sú da mit tůn oder schaffen wellent, vnd daz wir in o^vch alles daz gestatten tůn vnd vollefu^eren sont v´ber die vorgeschribenen wingarten vnd gu^eter vnd v´ber alles daz, so darzů vnd darin geho^ert, daz ain getrúwer trager billich von gewonhait vnd von reht tůn sol, won ich die vorgeschribenen wingarten vnd gu^eter mit aller zv^o geho^erde, alz vorgeschriben stât, geko^vffet han mit der vorgedahten priorinen vnd dez conuentes gemainem gůt von Johansen von Gerswendi burger ze Costentz vnd von V^olrichs ab Kellerbers^b) sines brůders sa^elgen kinden. Ez ist o^vch mit namen bedingot vnd berett, daz die vorgedahten fro^vwen vnd iro nâchkomen mir vnd minen erben von den vorgeschribenen wingarten vnd gu^etern aller ja^erlich ie ze sant Gallen tag ain hůn ze rehtem ja^erlichem zins geben vnd rihten sont. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so han ich Hainrice Garnleder da vorgenemt fúr mich vnd alle min erben min insigel gehenkt an disen brief. Der geben ist ze sant Gallen an dem na^ehsten fritag nâch sant Markus tag dez ewangelisten in dem jâr, do man zalt von gottes gebúrt drúzehenhundert jâr, sehszig jâr vnd darnach in dem núnden jâre.

Source Fulltext: Chartularium Sangallense VIII, Nr. 5172, S. 339-340.