Allen^a) den, die disen brief ansehent lesent oder ho^erent lesen, kúnden wir die nachgenemten Symon der Zim||berman vnd Hainrich Zeller der phiffer baid burger ze sant Gallen vnd veriehent offenlich mit disem brief || fúr v´ns fúr alle v´nser erben vnd nachkomen, daz wir lieplich vnd gu^etlich v´berain komen vnd verriht sient || gantzlich vnd gar mit den ersamen Bartholome dem Blarrer, V^olrich Ru^edger vnd mit Herman Spanhart phleger der siechen dez spittals ze sant Gallen¹ vmb alle die sto^esse misshellung vnd ansprachen, die wir mit ain ander gehept habent vntz her vff disen húttigen tag, alz dirre brief geben ist, von der strasse wegen in dem Bru^el² ze sant Gallen in der stat, die da zwischen v´nsern húsern vnd Jacob Schobels dez phisters hus gat hinderhin vntz an Johansen Gna^epsers garten, die selb rihtung zwischen v´ns vorbenemten baiden tailn gemachot vnd beschehen ist mit so^elicher beschaidenhait vnd in dem rehten dinge vnd gedinge, daz die selb strasse hinnenhin iemer mer eweklich aller ma^englichem gemain vnd offen sin sol vntz an dez obgenanten Johansen Gna^epsers garten, ez sie ze rosse oder ze fůsse oder wie man dann ie der selben strasse bedarf vnd notdurftig ist, an alle geua^erde.Vnd habent darumb von den obgenanten phlegern willeklich genomen vnd enphangen zwai phunt gůter vnd genger haller, die an v´nsern offenn nutz komen sint vnd bewendet. Vnd darumb so habent wir baid willeklich gelobt mit v´nseren trúwen vnd bindent v´ns vnd alle v´nser erben vnd nachkomen darzů mit disem brieue, daz wir noch dehain v´nser erben noch nachkomen, in dero hant die vorgeschribenen v´nserú húser hofstett vnd garten iemer koment, die vorgeschribenen strasse iemer mer eweklich offen lassen vnd die niemer werren noch verschlahen súllent mit dekainen dingen noch nieman andre an v´nser stat noch von v´nsern wegen an alle geua^erde. Vnd ze vrkúnd der warhait aller der vorgeschribenen dinge vnd vergiht so han ich Hainrich Zeller da vorgenemt fúr mich fúr alle min erben vnd nachkomen min aigen insigel offenlich gehenkt an disen brief, vnd won ich Symon der Zimberman da vorgenemt aigens insigels niht han, so han ich erbetten den erbern wolbeschaiden Eberhart Schirmer den schmit o^vch burger ze sant Gallen, der o^vch bi diser vorgeschribenen rihtung gewesen ist, daz er sin insigel fúr mich fúr alle min erben vnd nachkomen gehenkt hat an disen brief. Ich Eberhart Schirmer da vorgenemt vergich, daz ich von ernstlicher bet wegen dez obgenanten Symon Zimbermans, won er aigens insigels niht hat, min insigel fúr in fúr alle sin erben vnd nachkomen gehenkt han an disen brief mir vnd allen minen erben gantzlich vnscha^edlich. Diz beschach vnd ward dirre brief geben ze sant Gallen an sant Catherinen abent in dem jar, do man zalt von Cristus gebúrt drúzehenhundert jar, ahtzig jar vnd darnach in dem vierden jare.

Source Fulltext: Chartularium Sangallense X, Nr. 6047, S. 217-218.