Allen^a) den, die disen brief sehent lesent oder ho^erent lesen, kúnd ich Hainrich Stamler von Rebstain¹ || vnd vergich offenlich mit disem brieue fúr mich vnd fúr alle min erben von dez gůtes wegen, daz man || nemmet dez Schiessers Bo^vmgart gelegen an dem Ha^erdlin² in dem Rintal, daz ainhalb stosset an dez || spittals wingarten ze sant Gallen³ vnd anderthalb an Hainrich Ru^eschis wingarten, daz ich mit wasen vnd mit zwi vnd mit aller zv^o geho^erde reht vnd redlich geko^vffet han von Cůnrat dem Scherer von Volkenberg⁴ burger ze Chur vmb zwai phunt phenning gůter Costentzzer múnse vnd daz er mir geuertgot vnd zv^o minen handen braht hat von dem gotzhus ze sant Gallen, dannen ez lehen ist, alz der ko^vffbrief wol wiset, den ich darumb von im han, tůn ich aller ma^engliche(m) ze wissenn mit vrkúnd diz brieues fúr mich vnd fúr alle min erben, daz ich daz selb gůt, daz man nemmet dez Schiessers Bo^vmgart, mit allen rehten vnd mit aller zv^o geho^erde mit dez vorgedahten spittals gůt ze sant Gallen erko^vft han vnd zv^o minen handen enphangen an dez selben spittals stat alz ain getrúwer trager vnd in rehter tragnust wise, also daz ich vnd alle min erben den ersamen Bartholome dem Blarrer, V^olrich Ru^edger vnd Herman Spanhart phleger der siechen dez vorgeschobenen spittals ze sant Gallen vnd allen iren nachkomen, weli dann ie dez selben spittals phleger sint, an dez selben spittals stat vnd zv^o sinen handen warten vnd gehorsam sin súllent alz getrúw trager vnd in rehter tragnust wise, waz sv´ da mit tůn oder schaffen wellent, won o^vch ich noch dehain min erben mit dem vorgeschribenen gůt, daz man nemmet dez Schiessers Bo^vmgart, vnd waz dar zv^o geho^ert, niht ze tůnne noch ze schaffenn hant noch haben sont weder von aigenschaft noch von lehens wegen dann allain alz getrúwe trager vnd in rehter tragnust wise, alz vor ist beschaiden. Vnd ze vrkúnd der warhait aller der vorgeschribenen dinge vnd vergiht so han ich erbetten den ersamen minen gna^edigen herren Eglolf von Altstetten den eltern⁵, daz er sin insigel fúr mich vnd fúr alle min erben gehenkt hat an disen brief, won ich aigens insigels niht han, im vnd allen sinen erben gantzlich vnscha^edlich. Diz beschach vnd ward dirre brief geben ze sant Gallen an der na^ehsten mitwuchen nach sant Mychels tag in dem jar, do man zalt von Cristus gebúrt drúzehenhundert jar, ahtzig jar vnd darnach in dem vierden jare.

Source Fulltext: Chartularium Sangallense X, Nr. 6039, S. 209.