Ich^a) Johans von Hardêgg tůn kunt vnd vergich offenlich an disem brief fúr mich vnd alle min erben allen den, die disen brief ansehent lesent oder ho^erent lesen, das ich gesunt libs vnd můtes mit gůter vorbetrâh||tunge von miner rêdlicher not wegen vnd mit miner frúnde rât reht vnd rêdlich ains iemer werenden êwigen ko^vffes verko^vfft vnd ze ko^vffenn geben han dem beschaiden Johansen Ho^ern ze disen ziten burgermaister || ze sant Gallen vnd sinen erben, ob er enwa^er, disú nachgeschribnen lút gu^eter vnd lehenschaft, die min lehen wârent von dem erwirdigen gotzhus ze sant Gallen. Vnd sint das dú gu^eter, des ersten Hardegg || das burgstal gelegen im Rintal, der hof vff Êgge, der hof an Spilberg, der hof ze Loch, der wingart am Hurst, der wingart zer Tannen, ain mad bi Rebstainer furt, vnd dis nachgeschribnen ia^erlich zins vnd gelt, von Lo^epis mad bi der Ah¹ sibenthalben schilling pfenning, von dem gesa^ess am Hurst zwen schilling pfenning, von der hofstat vnd nussbo^vmen am Ha^erdlin² o^vch zwen schilling pfenning, von des Hâsen gůt drithalben schilling vnd sehsthalben pfenning vnd vierzehen aiger, von ainer hofstat vnder der burg vnd bo^vngarten vnd von dem aker in der Santgrůb³ sehs vnd zwainzig pfenning, von ainer jukart aker vnd von ainem bo^vngarten am Ha^erdlin, das Frik Swîgger hât, ahtzehen pfenning vnd zehen aiger, von ainem bongarten vnder Hardêgg, den Haini Has von Marpach⁴ hât, zehen pfenning alles gůter Costentzer múnse ia^erliches zinses vnd geltes, von hofstetten vnd bo^vngarten o^vch vnder Hardêgg nún pfenning der selben múnse vnd siben aiger, von ainer hofstat vnd ainem bongarten gelegen ze Rebstain⁵ im dorff, das V^olrich von Loch hatte, zwai hu^enr vnd die lehenschaft der selben gu^eter, von ainer wisen im Mos⁶, die Werli Buwenaker hât, zwai hu^enr, von ainer wisen im Mos ze Rebstain ist zwai mann mad, die Hansen wirtinne ab Stain inne hât, zwai hu^enr alles ia^erkliches geltes vnd zinses, vnd die lehenschaft der selben wisen, die lehenschaft zwaiger mann mad in dem Mos vnd zwaiger aker, der ainer lit am Ebnot⁷, der ander ze Hirscherrun⁸ vnderm hus, die lehenschaft des wingarten, den die Tro^emlin hât, die lehenschaft der aht mann mad gelegen zwischent Muntigul⁹ vnd Aichen wis¹⁰ vnd akren vnd owan, das Cůntz im Lo^v inn hât, vnd die manlehenschaft diser nâchgeschribnen gu^eter, des ersten vier mann mad ze Ho^ehst¹¹ vff der Brůder wis¹² hat inne Vrsula Ru^efin vnd Ru^edi Brunn, drú mann mad vff A^eschen¹³, ain jukart akers im Gaisso^vw¹⁴ haisset Krůgsbúnd⁷ vnd ain bletzli vff A^escha gelegen vor dem húglin, den bongarten, den man nemmt Vrsulen Bongart, sto^vsset an des Bo^eschers búnd vnd an Haintzen von Birbom, Hansen Bo^eschers búnd vnd sin hofstat vnd sin gesa^ess mit anander, da er vff sitzet, ze Ho^ehst im dorff, ain jukart aker gelegen an Scheffmachers bongarten, das der Vogul von Ho^ehst hât, ain hof gelegen am Rin haisset der Klebletz⁷ vnd a^ellú dú reht rehtung vogtreht vnd zins, die mir ald minen vordern vff her vff disen húttigen tag, als dirre brief ist geben, gangen sint ab des spitals der siechen ze sant Gallen¹⁵ gůten, vnd dis nâchgenemten lút Hansen Zimberman vnd Annun sin elichen wirtinnen, Hennin Buwenaker siner swester svn, Ma^ehthilden Hansen wirtinnen ab Stain vnd V^olrichen, Hainrichen vnd Elsbethen irú kint, Hainis Zimbermans sa^elgen kint Haini vnd Adelhait, Adelhait Ha^engillerr des obgenanten Johansen Zimbermans swester, Friken Swîgger vnd Gretun sin swester vnd V^olrichen von Loch vnd mit namen a^ellú dú gůt lehenschaft rehtung gewaltsami vnd nútzze, die ich gehept han bis vff disen húttigen tag, als dirre brief ist geben, von dem Bodense^v16 vf vntz an den Kobulstain¹⁷, die selben vorgenemten lút burgstal ho^ef vnd gu^eter vnd lehenschaften mit gerihten twingen vnd ba^ennen mit aller ehafti vnd gewaltsami mit vogtyen mit vogtreht vnd mit allen rehten nútzen vnd gewonhaiten vnd mit allen zůgeho^erden, als vor ist beschaiden, es sie benemptz ald vnbenemptz wissentz oder vnwissentz, vnd als ich vnd min vordern das alles vntz her vff disen húttigen tag, als dirr brief ist geben, inne gehept vnd genossen hâbent, han ich der obgenant Johans von Hardegg redlich vnd reht verko^vfft vnd ze ko^vffenn geben dem obgenanten Johansen Ho^ern vnd sinen erben, ob er enist, vmb fúnf hundert guldin vnd vmb ahtzig guldin gu^eter Vngerscher vnd Behaimscher gůter von gold vnd swa^er an gewiht, der selben guldin ich von im gantzlich nâch allem minem willen erberlich gewert vssgeriht vnd bezalt bin an den stetten, da ich minen wahsenden schaden mit verkomen han vnd minen fromen vnd nutz gefúrdert vnd geworben. Ich vergich o^vch, das ich dem selben Johansen Ho^ern die vorgeschriben lút das vorgeschriben burgstal vnd a^ellú vorgeschriben ho^ef gu^eter vnd lehenschaften mit allen rehten nútzen vnd zůgeho^erden, als vor ist beschaiden, v^fgeben vnd zů sinen handen geuêrtgot vnd brâht han mit des erwirdigen mines gna^edigen herren abt Cv^onen abt des gotzhus ze sant Gallen hant, als reht sitte vnd gewonlich was, vnd darvmb so han ich mich offenlich vnd willeklich verzigen vnd verzihe mich fúr mich vnd min erben mit disem brief gantzlich vnd gar der vorgenemten lút des vorgeschribnen burgstals aller vorgeschribnen ho^ef vnd gu^eter aller aigenschaft aller lehenschaft aller manschaft aller kuntschaft aller besatzung aller gewêr lút vnd brief aller reht vnd rehtung alles gaistlichen vnd weltlichen gerihtes aller vordrung vnd ansprachen, so ich ald min erben, ob ich enbin, ald ieman von v´nsren wegen zů den vorgenemten lúten burgstal ho^efen vnd gu^etern vnd lehenschaften oder zů dehainen iren rehten nútzen vnd zůgeho^erden, als vor ist beschaiden, ie gehattent oder hienach iemer gehaben oder gewinnen mo^ehtint, vnd sunderlich han ich mich verzigen alles schirmes alles v^szugs vnd alles des, damit ich ald min erben oder ieman von v´nsren wegen wider den vorgeschriben ko^vff iemer v´t kundint ald mo^ehtint gerêden gewerben ald getůn in dehain wîse, ân alle geua^erde. V´ber das alles han ich gelopt mit miner trúwe vnd loben mit disem brief fúr mich vnd min erben, der vorgenemten lút des obgeschribnen burgstals vnd aller vorgenemten ho^ef gu^eter vnd lehenschaften mit allen rehten vnd zůgeho^erden vnd des ko^vffs, als vor ist beschaiden, reht wer ze sinne nâch lehens reht, also bescha^eh, das ieman wer der wa^er fro^vw ald man den selben Johansen Ho^ern ald sin erben, ob er enwa^er, von der vorgenemten lút burgstals ho^ef gu^eter oder lehenschaften wegen gemainlich ald besunder anspra^echi oder vfftribi mit dehainen gerihten, ald wa^er das ieman wer der wa^er dehainerlay ansprach vordrung oder můtung hetti ald gewunni zů den vorgenemten lúten burgstal ho^efen gu^etern ald lehenschaften gemainlich oder zů dehainem der selben gu^eter besunder gantzlich oder an dehainem tail oder zů dehainen rehten nútzen vnd rehtungen, so darzů geho^erent, als vor ist beschaiden, es wa^er mit gaistlichen oder mit weltlichen gerihten, wenn wâ oder wie dik das bescha^eh, das ich dann vnd min erben, ob ich enbin, bi den trúwen, so ich gelopt han, den selben Johansen Ho^ern vnd sin erben iê darvmb verstan vnd versprechen vnd inen die selben ansprâchen inva^ell vnd gebresten gantzlich vnd gar ablegen so^ellint vnd wellent âne allen fúrzug vnd widerrede vnd âne allen sinen vnd siner erben schaden. Wa^er aber, das ich ald min erben das nit ta^etint oder daran sv´mig wa^erint, wie dann der selb Johans Ho^er ald sin erben des ze schaden koment, wie sich das fůgti in dehain wîse, den schaden allen so^ellin ich vnd min erben, ob ich enbin, inen gantzlich ablegen vnd ab tůn ân allen fúrzug vnd widerrede bi den trúwen, so ich gelopt han. Vnd ist dis alles reht vnd rêdlich beschehen vnd vollefu^ert mit allen worten werken vnd geta^eten, so nâch gewonhait vnd nâh reht hierzů gehortent vnd notdurftig wârent vnd als es billich vnd durch reht kraft vnd maht nv vnd hienach sol vnd mag haben. Vnd darvmb ze ainer gantzen sicherhait vnd wârhait vnd ze ainer ewigen sta^eten sicherhait aller vorgeschribnen dinge so han ich Johans von Hardegg da vorgenemt min aigen insigel fúr mich vnd alle min erben offenlich gehenkt an disen brief. Der ist geben ze sant Gallen an dem na^ehsten ma^entag nach dem palmtag, der im mêrtzen kam, in dem jâre, do man von Cristus gebúrt zalte drúzehenhundert jâr vnd darnach in dem aht vnd ahtzigosten jâre.

Source Fulltext: Chartularium Sangallense X, Nr. 6256, S. 488-491.