Allen^a) den, die disen brief ansehent lesent oder ho^erent lesen, kúnde ich Johans von Hardêgg vnd vergich offenlich an disem brief fúr mich vnd min erben, als ich mit gůter vorbetrahtunge vnd mit || miner frúnde rât redlich vnd reht verko^vfft vnd ze ko^vffenn geben han dem fúrsihtigen beschaiden Johansen dem Ho^ern ze disen ziten burgermaister ze sant Gallen vnd sinen erben, ob er enwa^er, disú || nachgeschribnen lút vnd gu^eter Hardêgg das burgstal gelegen im Rintal, den hof vff Êgg, den hof an Spilberg, den hof ze Loch, den wingarten am Hurst, den wingarten zer Tannen, ain mad bi || Rebstainer furt vnd dis nachgeschribnen ia^erlich zins vnd gelt von Lo^epis mad bi der Ah sibenthalben schilling pfenning, von dem gesa^ess am Hurst zwen schilling pfenning, von der hofstat vnd nussbo^vmen am Ha^erdlin zwen schilling pfenning, von des Hasen gůt drithalben schilling vnd sehsthalben pfenning vnd vierzehen aiger, von ainer hofstat vnder der burg vnd bongarten vnd von dem aker in der Santgrůb sehs vnd zwainzig pfenning, von ainer júkart aker vnd von ainem bo^vngarten am Ha^erdlin, das Frik Swigger hat, ahtzehen pfenning vnd zehen aiger, von ainem bongarten vnder Hardegg, den Haini Has von Marpach hat, zehen pfenning alles gůter Costentzer múnse ia^erlichs zinses vnd geltes, von hofstetten vnd bongarten o^vch vnder Hardegg nún pfenning der selben múnse vnd siben aiger, von ainer hofstat vnd ainem bongarten gelegen ze Rebstain im dorff, das V^olrich von Loch hatt, zwai hu^enr, vnd die lehenschaft der selben gu^eter, von ainer wisen im Mos, die Werli Buwenaker hat, zwai hu^enr, von ainer wisen im Mos ze Rebstain ist zwai mann mad, die Hansen wirtinne ab Stain inne hat, zwai hu^enr, alles ia^erkliches geltes vnd zinses vnd die lehenschaft der selben wisen, die lehenschaft zwaiger mann mad in dem Mos vnd zwaiger aker, der ainer lit am Ebnot, der ander ze Hirscherrun vnderm hus, die lehenschaft des wingarten, den die Tro^emlin hât, die lêhenschaft der aht mann mad gelegen zwúschen Muntigul vnd Aichen wis, vnd akran vnd o^vwan, das Cůntz im Lo^v inne hât, vnd die manlehenschaft diser nâchgeschribnen gu^eter, des ersten vier mann mad ze Ho^ehst vff der Brůder wis, hat inne Vrsula Ru^efin vnd Ru^edi Brunn, drú mann mad vff A^eschen, ain júkart akers im Gaisso^vw haisset Krůgsbúnd vnd ain blêtzli vff A^escha gelegen vor dem húglin, den bongarten, den man nemmt Vrsulen bongart, sto^vsset an des Bo^eschers búnd vnd an Haintzen von Birbo^vm, Hans Bo^eschers búnd vnd sin hofstat vnd sin gesa^ess mit anander, da er vff sitzet, ze Ho^ehst im dorff ain júkart aker gelegen an Scheffmachers bongarten, das der Vogul von Ho^ehst hât, ain hof gelegen am Rin haisset der Klêbletz, vnd a^ellú dú reht rehtung vnd zins, die mir ald minen vordern vntz her vff disen húttigen tag, als dirr brief ist geben, gangen sint ab des spitals der siechen ze sant Gallen gu^etern, vnd dis nâchgenemten lút Hansen Zimberman, Annun sin elichen wirtinnen, Hennin Buwenaker siner swester svn, Ma^ehthilden Hansen wirtinnen ab Stain vnd V^olrichen, Hainrichen vnd Elsbethen irú kint, Hainis Zimbermans sa^elgen kint Haini vnd Adelhait, Adelhait Ha^enggillerr des obgenanten Johansen Zimbermans swester, Friken Swigger vnd Gretun sin swester vnd V^olrichen von Loch vnd mit namen a^ellú dú gůt lehenschaft vnd rehtung, die ich gehept han bis her vff disen húttigen tag, als dirre brief ist geben, von dem Bodense^v v^f vntz an den Kobulstain, die selben vorgeschriben lút vnd gůt vnd lehenschaft mit gerihten twingen vnd ba^ennen mit aller êhafti mit aller gewaltsami mit vogtye mit vogtreht vnd mit allen rehten nútzen vnd gewonhaiten vnd mit aller zůgeho^erde, es sie benemptz ald vnbenemptz vnd als ich vnd min vordem das alles inne gehept vnd genossen habent vntz vff disen húttigen tag, als dirr brief ist geben vnd als der ko^vffbrief, den ich dem obgenemten Johansen Ho^ern hierúber besunder geben han, aigenlich wîset, han ich dem selben Johansen Ho^ern redlich vnd reht ze ko^vffenn geben vmb fúnf hundert vnd ahtzig guldin, dero ich gantzlich von im gewert vnd bezalt bin, vnd darvmb han ich gelopt vnd loben mit disem brief, der vorgedâhten lút vnd aller vorgeschribnen gůt vnd lehenschaft mit allen rehten nútzen vnd zůgeho^erden, als vor ist beschaiden, vnd des ko^vffs reht wer ze sinne nâch lehens reht vnd nâch des ko^vffbriefs lut vnd sag, den ich besunder dem selben Johansen Ho^ern hierumb geben han, vnd han dem selben Johansen Ho^ern vnd sinen erben hierúber ze merer sicherhait zů mir ze rehten wern geben vnd gesetzt dis erbern lút Eglolffen von Altstetten¹ den eltern, Johansen Kayserman amman ze Bregentz² vnd Johannes Nefen hofschriber ze Bregentz, die hant im o^vch alle drie mit mir vnuerschaidenlich gelopt mit ir trúwen, der vorgenemten lút vnd aller vorgeschribner gůten mit allen rehten nútzen vnd zůgeho^erden, als vor ist beschaiden, vnd des ko^vffs nâch des vorgedahten ko^vffbriefs lut vnd sag, den ich besunder dem selben Johansen Ho^ern hierúber geben han, reht wern ze sinne nâch lehens reht, also bescha^ech, das ieman, wer der wa^er fro^vw ald man, den selben Johansen Ho^ern ald sin erben von der vorgenemten lút oder gu^eter wegen gemainlich ald besunder anspra^echi oder v^fftribi mit dem rehten, ald wa^er das ieman, wer der wa^er, dehainerlay ansprach oder vordrung hêtti ald gewunni zů den vorgenemten lúten ald gu^etern gemainlich ald zů dehainem der selben gu^eter besunder gantzlich oder an dehainem tail oder zů dehainerlay lehenschaft rehten nútzen vnd rehtungen, so darzů geho^erent, als vor ist beschaiden, es wa^er mit gaistlichen oder mit weltlichen gerihten, wenn wâ oder als dik das bescha^eh, das ich dann vnd min erben, ob ich enbin, vnd o^vch die obgenanten wern bi den trúwen, so wir gelopt habent, den selben Johansen Ho^ern vnd sin erben darvmb versprechen vnd verstan vnd inen die selben so^elich ansprâchen inva^ell vnd gebresten gantzlich vnd gar ablegen so^ellin vnd wellent âne allen fúrzug vnd widerrede vnd âne allen sinen vnd siner erben schaden, ob er enist. Wa^er aber, das ich vnd die obgenanten wem das niht ta^etint vnd daran sv´mig wa^erint, wie dann der selb Johans Ho^er ald sin erben des ze schaden koment, wie sich das fůgti in dehain wise, den schaden allen so^ellin ich vnd min erben vnd die obgenanten wern inen gantzlich ablegen vnd abtůn ân allen fúrzug, vnd hant o^vch sú vnd ir helffer, wer die sint, fries vrlob vnd vollen gewalt, das si mich vnd min erben, ob ich enbin, vnd o^vch die obgenanten wem hiervmb pfenden no^eten heften vnd angriffen sont vnd mugent an lúten vnd gůten in stetten in do^erffern vnd vff dem lande mit gaistlichem vnd mit weltlichem geriht vnd âne geriht ân klag vnd ân zorn, wie vnd wâ oder wâhin si das getůn mugent oder wellent, als vil vnd als lang, vntz in ie aller der schad, den si danne von des vorgedahten v^ftribens ansprachen vordrung vnd inva^ell wegen enpfangen hant, vnd o^vch des schaden, in den si vnd ir helffer von des selben pfendens heftens vnd angriffens wegen koment, gantzlich ân allen iren schaden gewert v^ssgeriht vnd entschadgot werdent, vnd sol mich noch min erben noch die vorgenemten wern noch v´nser lút noch gůt davor niht schirmen enkain frihait noch gewonhait enkain buntnust der herren noch der stêtt enkain reht des landes noch der stêtt enkain burgreht noch enkain reht weder gaistlichs noch weltlichs gerihtes noch enkainerlay ander sache noch schirm. Ich han o^vch fúr mich vnd min erben offenlich gelopt mit miner trúwe in aides wîse, die obgenanten wern vnd ir erben gantzlich ze lo^esenn von allem dem schaden, den si von der vorgedahten gelúpt vnd werschaft wegen enpfâhent. Vnd ze offemm wâren vrkúnde vnd ze ainer gantzer sicherhait aller vorgeschribner dinge han ich Johans von Hardegg da vorgenemt fúr mich vnd min erben min insigel gehenkt an disen brief. Darnach veriehent wir die obgenanten Eglolf von Altstetten, Johans Kayserman amman vnd Johannes Nef hofschriber ze Bregentz ain gantz wârhait aller der dinge, so von v´ns da vorgeschriben stât an disem brief, vnd des ze mêrer sicherhait so habent wir o^vch v´nsrú insigel offenlich gehenkt an disen brieff. Der ist geben ze sant Gallen an dem na^ehsten dunstag vor sant Ambrosius tag, do man von Cristus gebúrt zalt drúzehenhundert jâr vnd darnach in dem ahtvndahtzigosten jâre.

Source Fulltext: Chartularium Sangallense X, Nr. 6262, S. 498-500.